Objekti kozmik u zbulua më 1 korrik 2025 nga teleskopi i vrojtimit ATLAS në Kili dhe u identifikua si vetëm trupi i tretë ndëryjor i regjistruar ndonjëherë, pas ʻOumuamua në vitin 2017 dhe 2I/Borisov në 2019.
NASA e ka klasifikuar 3I/ATLAS si kometë, por disa shkencëtarë – përfshirë Profesorin Avi Loeb të Universitetit të Harvardit – kanë ngritur dyshime se sjellja e saj mund të tregojë për shenja të teknologjisë aliene. Vëzhgimet e bëra gjatë muajit tetor treguan se kometa përjetoi një përshpejtim jo-gravitacional pranë perihelionit, duke lëvizur më shpejt sesa do të lejonte vetëm graviteti.
Sipas Loeb, nëse në muajt në vijim nuk vërehet ndonjë re e madhe gazi përreth saj, “atëherë përshpejtimi jo-gravitacional mund të konsiderohet si një shenjë teknologjike e një sistemi shtytës”. Ky qëndrim ka ndezur spekulime të shumta në rrjet, duke përfshirë edhe reagime nga figura të njohura të kulturës pop.
Kim Kardashian i është drejtuar NASA-s përmes një postimi në rrjetet sociale, duke pyetur me ironi: “Prit… çfarë çaji ka në 3I/ATLAS?!?!!!!!!!!!???????” Ndërkohë, administratori në detyrë i NASA-s, Sean Duffy, u përgjigj duke theksuar se objekti është “kometa e tretë ndëryjore që kalon nëpër sistemin tonë diellor” dhe se “nuk ka asnjë shenjë të jetës aliene apo kërcënim për Tokën”.
Në një intervistë për “The Joe Rogan Experience”, Elon Musk diskutoi gjithashtu për madhësinë dhe përbërjen e pazakontë të kometës, duke paralajmëruar se një objekt i tillë, nëse do të devijonte drejt Tokës, mund të shkaktonte dëme në shkallë kontinentale.
Megjithëse NASA e konsideron 3I/ATLAS një trup qiellor pa rrezik për planetin tonë, ndryshimet e papritura në ngjyrë dhe ndriçim, si dhe përshpejtimi i saj misterioz, e kanë kthyer këtë kometë në një nga misteret më intriguese të sistemit diellor.
