Ish-presidenti amerikan George W. Bush ka udhëhequr homazhet për Dick Cheney, duke thënë se vdekja e tij është “një humbje për kombin dhe një trishtim për miqtë e tij”.
Sipas një deklarate të familjes, Cheney ndërroi jetë të hënën në mbrëmje, në moshën 84-vjeçare, për shkak të komplikimeve nga pneumonia dhe sëmundjet e zemrës e të enëve të gjakut.
Ai u bë një nga nënkryetarët më me ndikim në historinë e Shteteve të Bashkuara gjatë presidencës së Bushit, duke lënë pas një trashëgimi të diskutueshme si një nga arkitektët kryesorë të “luftës kundër terrorizmit” dhe një mbështetës i hershëm i pushtimit të Irakut në vitin 2003.
“Historia do ta kujtojë atë si një ndër shërbyesit publikë më të shquar të brezit të tij,” tha Bush në një deklaratë.
“Cheney ishte një patriot që sillte integritet, inteligjencë të lartë dhe përkushtim të thellë në çdo detyrë që merrte përsipër,” shtoi Bush.
“Unë mbështetesha tek ai për këshillat e tij të ndershme e të drejtpërdrejta, dhe ai kurrë nuk dështoi të jepte më të mirën e vet. Ai qëndronte fort pas bindjeve të tij dhe vendoste në prioritet lirinë dhe sigurinë e popullit amerikan.”
Condoleezza Rice, e cila shërbeu si Sekretare e Shtetit në administratën Bush bashkë me Cheney, tha se e admironte atë “për integritetin dhe dashurinë e tij për vendin tonë.”
“Ai ishte një prani frymëzuese dhe një mentor që më mësoi shumë për shërbimin publik,” shkroi ajo në platformën X.
