Aktorja e famshme hollivudiane, Diane Ladd, tre herë e nominuar për çmimin Oscar dhe një prej figurave më të dashura të kinemasë amerikane, ka ndërruar jetë në moshën 89-vjeçare.
Lajmi i trishtë është konfirmuar nga vajza e saj, aktorja fituese e Oscar-it, Laura Dern, e cila në një deklaratë prekëse tha se nëna e saj u nda nga jeta në shtëpi, në Kaliforni.
Diane Ladd u bë e njohur në vitin 1974 me rolin e kamarieres në filmin e Martin Scorsese, Alice Doesn’t Live Here Anymore, që i solli nominimin e parë për Oscar.
Në dekadat që pasuan, ajo interpretoi dhjetëra role në film e televizion, duke mbetur një figurë e qëndrueshme e artit amerikan.
Në vitin 1991, ajo dhe vajza e saj Laura bënë histori si çifti i parë nënë-bijë të nominuara për Oscar në të njëjtin film, Rambling Rose.
Në vitet e fundit, Ladd dhe Dern ruajtën një lidhje të fortë, të cilën e përshkruan edhe në librin e tyre të përbashkët, Honey, Baby, Mine: A Mother and Daughter Talk Life, Death, Love.
