Kevlari, materiali klasik i përdorur për mburoja antiplumb dhe automjete të blinduara, ka gjetur rivalin e tij. Një ekip shkencëtarësh nga Universiteti i Pekinit ka zhvilluar një material të ri që është më i fortë, më rezistent dhe më efektiv në ndalimin e plumbave se Kevlari, edhe pse është dukshëm më i hollë. Studimi u publikua në revistën Matter.
Për të përballuar goditje me shpejtësi të lartë, si ato të plumbave, një material duhet të ketë forcë të madhe mekanike dhe aftësi të lartë përthithëse të energjisë. Problemi me Kevlarin, i cili përbëhet nga fibra aramidike, është se sa më i fortë të bëhet materiali, aq më i brishtë rezulton, duke e bërë të vështirë ruajtjen e elasticitetit.
Pas gjashtë vitesh pune, profesor Jin Zhang dhe ekipi i tij krijuan një fibër të re duke kombinuar një aramid heterociklik me nanotuba karboni të gjatë dhe të trajtuar (tl-SWNTs). Këta nanotuba janë shumë të fortë, jashtëzakonisht të lehtë dhe më të hollë se një fije floku njerëzor. Sekreti qëndron në mënyrën si u orientuan këto struktura: shkencëtarët arritën t’i rreshtonin zinxhirët e aramidit dhe nanotubat në mënyrë të drejtë e paralele përmes një procesi të shumëfishtë shtrirjeje. Kjo lidhje e ngushtë midis përbërësve parandalon rrëshqitjen e tyre gjatë goditjeve, duke i lejuar fibrës të përthithë shumë më tepër energji pa u dëmtuar.
Testet balistike treguan se fibra e re ka forcë dinamike dukshëm më të lartë se materialet ekzistuese dhe përthith më shumë se dyfishin e energjisë së Kevlarit, 706.1 megaxhaul për metër kub. Kur u end në pëlhurë, ajo tregoi performancë superiore ndaj goditjeve në krahasim me materialet mbrojtëse aktuale.
Sipas studiuesve, kjo fibër mund të bëjë që pajisjet e ardhshme mbrojtëse të jenë shumë më të lehta, më të holla dhe më të sigurta.
