Intesa Sanpaolo Bank Albania, pjesë e Grupit Intesa Sanpaolo, njoftoi emërimin e Giuseppe Giampietro si Drejtorin e ri të Përgjithshëm Ekzekutiv të Bankës. Ai pason Alessandro D’Oria, i cili ka vendosur të dalë në pension pas katër vitesh të njëpasnjëshme në pozicionin e Drejtorit të Përgjithshëm të Intesa Sanpaolo Bank Albania.
Giampietro ka mbi 25 vite përvojë ndërkombëtare brenda Grupit Intesa Sanpaolo, me një histori të gjerë suksesi në drejtimin e organizatave komplekse dhe arritjen e rezultateve të shkëlqyera në fushën e Bankingut Korporativ dhe atij të Investimeve.
Karriera e tij përfshin tregje dhe mjedise të ndryshme biznesi, ku ai ka udhëhequr vazhdimisht transformimin, përsosmërinë operacionale dhe fitimet e qëndrueshme.
Giampietro ka mbajtur pozicionet e Drejtorit të Përgjithshëm Ekzekutiv dhe të Drejtorit të Përgjithshëm në disa banka të Grupit. Sipas Intesas, emërimi i tij reflekton angazhimin e vazhdueshëm të Intesa Sanpaolo për përkushtim ndaj ekselencës dhe rritjes së qëndrueshme në Shqipëri, duke forcuar rolin e Bankës si partner i besueshëm për bizneset dhe individët që kërkojnë shërbime financiare të nivelit të lartë.
“Pranimi i kësaj sfide të re në Intesa Sanpaolo Bank Albania është një privilegj dhe një përgjegjësi,” – tha Giampietro./kapitali
