Marine Le Pen deklaroi ditën e sotme se nuk do të kandidojë për presidencën e Francës më 2027, nëse gjykata e apelit nuk e anulon ndalimin aktual të pjesëmarrjes në zgjedhje që i është shqiptuar.
Liderja e ekstremit të djathtë francez, e cila ka qenë tri herë kandidate për presidencë, do të kthehet në gjyq më 13 janar, pasi ka bërë apel kundër dënimit për shpërdorim fondesh nga Parlamenti Evropian, të cilin e ka mohuar vazhdimisht.
Gjykata e shpalli fajtore dhe i shqiptoi Le Penit një ndalim të menjëhershëm pesëvjeçar për të kandiduar për çdo post, të cilin gjykata e apelit mund ta anulojë.
Nëse Le Pen shpallet sërish fajtore dhe i shqiptohet një dënim që i ndalon kandidimin në zgjedhjet presidenciale, ajo deklaroi se do ta pranojë fatin dhe do t’ia kalojë stafetën 30-vjeçarit të saj të mbrojtur, Jordan Bardella.
“Meqenëse gjykata e apelit ka gjasa të nxjerrë vendimin në shtator, nuk do ta lë këtë të zgjatet”, tha ajo për RTL. Duke iu referuar Bardellas, Le Pen deklaroi: Jordan ka kualifikimet për të marrë çdo pozicion.
Siç theksoi, Bardella arriti rezultate vërtet spektakolare si kryekandidat në zgjedhjet evropiane.
“Mendoj se Jordan ka kualifikimet për të marrë çdo pozicion që kërkon vullnet, bindje dhe dashuri të pakufizuar për vendin”, shtoi ajo.
