Sharon Osbourne ka zbuluar një episod tronditës që ndodhi pas vdekjes së Ozzy Osbourne, duke treguar se një grua i kishte dërguar në shtëpi mostra biologjike, thonj këmbësh, flokë dhe gjak, me pretendimin se ishte vajza e fshehtë e legjendës së rock-ut dhe i lutej të kryhej një test ADN-je.
Këto zbulime u bënë gjatë podcastit familjar, i cili u publikua për herë të parë pas ndarjes nga jeta të Ozzy-t më 22 korrik, në moshën 76-vjeçare, si pasojë e një ataku në zemër.
Gjatë bisedës, Kelly Osbourne tregoi se familja është përballur me reagime të çuditshme nga fansat pas vdekjes së ikonës:
“Madje kemi njerëz që thonë se flasin me babin nga varri”
Sharon shtoi se situata më e pazakontë ishte rasti i gruas që dërgoi materialet biologjike.
“Na dërgoi një thua këmbe, pak gjak dhe pak flokë, sepse është e bindur që është fëmija e Ozzy-t” -shpjegoi ajo, tejet e habitur.
Ozzy Osbourne la pas gjashtë fëmijë: tre nga martesa me Sharon dhe tre nga martesa e tij e parë me Thelma Riley, përfshirë edhe djalin e adoptuar Elliot, raporton DailyMail.
Në podcast, Sharon foli edhe për përkeqësimin e gjendjes shëndetësore të Ozzy-t para vdekjes. Ajo zbuloi se ai ishte rrëzuar në fillim të dhjetorit dhe, pavarësisht se nuk ishte ankuar, kishte thyer një rruazë të shtyllës kurrizore. Ky incident çoi në një “efekt domino”, pasi Ozzy u përball edhe me pneumoni të përsëritura gjatë vitit.
“Trupi i tij nuk mund të shërohej më si dikur. Ai ishte në shumë dhimbje”-tha Sharon, duke përshkruar muajt e fundit të jetës së rokerit legjendar.
