Dinamo e këtij sezoni mund të konsiderohet një nga skuadrat më të çuditshme për sa i përket rezultateve dhe asaj që ka dhënë në fushën e blertë.
Shpesh herë, blutë kanë bindur me lojën e tyre, por një moment, një episod apo një pasiguri në mbrojtje, ka bërë që ndeshja të humbet dhe diçka e tillë ndodhi herën e fundit në Shkodër, humbja në Elbasan pas të kuqit, apo edhe ajo ndaj Teutës në Durrës ku polemikat nuk munguan për shkak të gjykimit apo edhe vonesave.
Por, Dinamo ka edhe një problem këtë sezon me vazhdimësinë, duke qenë se është ndër skuadrat e vetme të “Top 4” që nuk ka arritur ende të bëjë 3 fitore radhazi këtë sezon, megjithëse diferenca e pikëve është shumë e ngushtë. Kështu, pasi Dinamo mori fitore ndaj Tiranës e Flamurtarit, u ndal në një barazim ndaj Egnatias.
Pas këtij barazimi, Dinamo mori 2 fitore të tjera duke mundur Vorën dhe Partizanin, por më pas u ndal në një tjetër barazim kundër Teutës, për të prishur për herë të dytë ecurinë që nuk e lejoi të merrte fitoren e tretë. Aktualisht, Dinamo ka një barazim dhe një humbje në dy sfidat e fundit e ndaj Elbasanit, duhet të rikthehet te fitorja, e më pas të shpresojë se mund të arrijë të bëjë më shumë në ndeshjet e ardhshme.
