Studentët në Beograd kundër Trump Tower, paralajmërojnë bllokim fizik
Më 22 nëntor 2025, studentët në Beograd protestuan kundër ndërtimit të dy kullave Trump në vendin e ish-Ministrisë së Mbrojtjes, e cila u bombardua në vitin 1999 nga NATO.
Ata paralajmërojnë se do të përdorin trupat e tyre për të ndaluar buldozerët, duke e konsideruar këtë si të vetmen mënyrë për të mbrojtur këtë monument të kujtesës kombëtare.
Protestuesit akuzojnë qeverinë e Aleksandar Vuçiç për falsifikim dokumentesh për të lehtësuar shitjen e pronës. Projekti është pjesë e bashkëpunimit me Affinity Partners, kompaninë e dhëndrit të Donald Trump, Jared Kushner.
Studentët dhe opozita e shohin këtë si shembull të korrupsionit dhe shkeljeve ligjore. Lideri i opozitës, Savo Manojloviç, paralajmëron protesta masive, nëse projekti vazhdon. Shumë qytetarë e krahasojnë zemërimin me atë pas shembjes së një stacioni hekurudhor në Novi Sad, ku humbën jetën 16 persona, raporton Corriere Della Sera.
Serbia ka nevojë për miratimin e SHBA-ve për të shitur rafinerinë e saj kryesore, që kontrollohet nga rusët. Bashkimi i arkitektëve serbë ka paralajmëruar Kushnerin, për shkelje ligjore të projektit.
Publiku është i zemëruar dhe protestat rriten çdo ditë. Megjithatë, Vuçiç deklaroi se projekti do të vazhdojë dhe e sheh si një marrëveshje të mirë për vendin. Ai premtoi se ndërtimi nuk do të nisë së shpejti, por kjo nuk qetëson studentët.
Ata insistojnë se do të ndërmarrin veprime fizike për të mbrojtur ish-Ministrinë e Mbrojtjes. Situata mbetet e tensionuar, ndërsa përplasje të reja janë të mundshme në ditët në vijim. Protesta reflekton pakënaqësi të gjerë ndaj qeverisë dhe projekteve me oligarkë të huaj.
