Tajvani ka hedhur poshtë me vendosmëri pretendimet e Presidentit kinez Xi Jinping, të shprehura gjatë telefonatës së tij të fundit me Presidentin amerikan Donald Trump, ku ai e cilësoi “ribashkimin” e ishullit me Kinën kontinentale si një element thelbësor të rendit ndërkombëtar të krijuar pas Luftës së Dytë Botërore.
Kryeministri tajvanez, Cho Jung-tai, reagoi përmes mediave vendase duke theksuar se vendi i tij “është një shtet plotësisht sovran dhe i pavarur”. Ai nënvizoi se statusi i ishullit nuk është objekt negociimi dhe nuk mund të përcaktohet nga Pekini.
“Dua të theksoj edhe një herë se për 23 milionë qytetarët tanë, ideja e ‘kthimit’ nën kontrollin e Kinës nuk është as e pranueshme dhe as një mundësi”, tha Cho.
Deklaratat e Tajvanit vijnë në një moment tensioni të shtuar në marrëdhëniet Pekin–Taipei, teksa Kina vazhdon të shtojë presionin politik dhe ushtarak mbi ishullin, ndërsa Tajvani thekson se e ardhmja e tij mund të vendoset vetëm nga populli i tij.
