Shkencëtarët kanë zbuluar se edhe nëse përdorim metoda të veçanta për të ftohur Tokën, ato nuk mund t’i ndalojnë ndryshimet e reshjeve dhe lagështisë. Kjo i lë të rrezikuara kulturat e rëndësishme si rrushi, kafeja dhe kakaoja. Një studim i ri tregon se edhe ndërhyrjet më të guximshme për klimën mund të mos e mbrojnë dot prodhimin e këtyre kulturave, të cilat mbështesin industri të mëdha botërore dhe miliona fermerë. Temperaturat që rriten dhe ndryshimet në reshje po shkaktojnë luhatje të mëdha nga viti në vit, duke e bërë të vështirë që fermerët të kenë prodhim të qëndrueshëm.
Studiuesit analizuan nëse Stratospheric Aerosol Injection (SAI), një metodë që synon të ftohë planetin duke hedhur grimca reflektuese në atmosferë, mund të ndihmonte në zonat kryesore ku rriten rrushi, kafeja dhe kakaoja në Europën Perëndimore, Amerikën e Jugut dhe Afrikën Perëndimore.
Ata përdorën simulime kompjuterike për periudhën 2036–2045, duke analizuar temperaturën, reshjet, lagështinë dhe rrezikun e sëmundjeve. Rezultati: SAI e ul temperaturën, por nuk mban të qëndrueshme kushtet që u duhen këtyre bimëve. Vetëm 6 nga 18 rajone treguan përmirësim të qëndrueshëm.
Studimi tregon se reshjet dhe lagështia e paparashikueshme e dëmtojnë efektin e SAI. Edhe nëse temperatura bie, kjo metodë nuk mund të kontrollojë mirë përmbytjet dhe lagështinë, duke sjellë prodhim të paqëndrueshëm dhe të ardhura të pasigurta për fermerët.
Sipas bashkautores dr. Ariel Morrison, vetëm ulja e temperaturës nuk është zgjidhje: Kakaoja e duron më shumë të nxehtin, por është shumë e ndjeshme ndaj sëmundjeve që shkaktohen nga kombinimi i të nxehtit, reshjeve dhe lagështisë. Edhe ndryshimet natyrore të klimës krijojnë rezultate shumë të ndryshme, edhe nën të njëjtin skenar SAI.
Dr. Morrison shton se SAI mund të sjellë lehtësim të përkohshëm në disa zona, por nuk është zgjidhje e sigurt. Për të mbrojtur këto kultura, duhen strategji përshtatjeje sipas kushteve lokale, investime në bujqësi më të qëndrueshme dhe bashkëpunim global.
