Evropa po përballet me një krizë të heshtur, por serioze shëndetësore. Më shumë se gjysma e njerëzve që jetojnë me HIV diagnostikohen në fazë të avancuar, duke minuar përpjekjet për të eliminuar AIDS-in si kërcënim për shëndetin publik deri në vitin 2030.
Sipas të dhënave të publikuara për vitin 2024 nga Qendra Evropiane për Parandalimin dhe Kontrollin e Sëmundjeve (ECDC) dhe Organizata Botërore e Shëndetësisë (OBSH), 54% e diagnozave të reja të HIV në kontinent janë bërë tepër vonë, në një fazë ku trajtimi është më pak efektiv dhe rreziqet shëndetësore shumë më të larta.
Kjo situatë do të thotë se dhjetëra mijëra persona nuk po marrin në kohë terapinë antiretrovirale që u shpëton jetën, duke rritur mundësinë e zhvillimit të AIDS-it, të vdekshmërisë dhe të transmetimit të mëtejshëm të virusit.
Organizatat ndërkombëtare paralajmërojnë se për të arritur objektivin e vitit 2030, vendet evropiane duhet të përmirësojnë ndjeshëm qasjen në testim, ndërgjegjësimin dhe shërbimet parandaluese, sidomos në grupet e popullatës që janë më të rrezikuara.
