Bilanci tragjik i përmbytjeve që goditën këtë javë ishullin Sumatra në Indonezi është rritur në të paktën 84 të vdekur, ndërsa dhjetëra persona vazhdojnë të rezultojnë të zhdukur, sipas ekipeve të shpëtimit.
Zëdhënësi i policisë së Sumatrës Veriore, Ferry Walintukan, deklaroi se në këtë provincë janë konfirmuar 62 viktima, 95 të plagosur dhe të paktën 65 persona vazhdojnë të jenë të zhdukur. Ndërkohë, në provincën fqinje të Sumatrës Perëndimore, autoritetet raportuan 22 viktima të tjera dhe 12 persona të zhdukur.
Ekipet e emergjencës po vazhdojnë kërkimet në zonat më të goditura, ndërsa autoritetet paralajmërojnë se bilanci mund të rritet më tej për shkak të dëmeve të mëdha dhe mungesës së qasjes në disa zona të izoluara.
