Ish-deputeti, Myslim Murrizi ka hedhur sot akuza ndaj përfaqësuesve të Partisë Demokratike se që prej vitit 2008 kanë bashkuar votat me socialistët vetëm për interesin e tyre në Kuvend.
Përmes një postimi në rrjetet sociale, Murrizi shprehet se me këtë hap, demokratët kanë shitur demokracinë dhe sovranitetin e votës së qytetarëve, që në pesë palë zgjedhje nuk po marrin asnjë votë.
Sipas Murrizit, ky akt i PD-së ka vrarë garën dhe meritokracinë, pasi prej kohësh është shtuar hipokrizia dhe përulja ndaj kryetarëve që hartojnë listat.
“Kur shoh nëpër ekrane Bylykbashin pas 11 majit që thotë se duhet sistem tjetër zgjedhor, më vjen për të vjellë.
Kur belbëzon dhe quan si të “shenjtë” marrëveshjen e 5 qershorit 2020, por që nuk e kërkoi kurrë në korrik 2024 kur bashkoi votat me Ramën për të mbyllur 30% të listave, që t’u siguronte një karrige të qelbur për menderen e tyre në Parlament, më vjen për të dhj…
Dhe kur e dëgjoj që ndonjëherë flet edhe për sistem mazhoritar, habitem shumë sa hipokrit është, sepse ky në Durrës humb edhe po të votohet brenda familjes me vota.
Të paktën mbani mbyllur kapakun e pusetës së “halës”, se sa herë që e hapni qelbni dynjanë.
Keni qysh në prill 2008 që keni shitur demokracinë dhe sovranitetin e VOTËS SË QYTETARËVE, vetëm që të jeni në Parlament pa votë, dhe shqiptarët prej vitit 2009, 2013, 2017, 2021, 2025, pra pesë palë zgjedhje, nuk zgjedhin dot, por thjesht votojnë, si në komunizëm.
Me këtë ligj të padenjë të dakordësuar mes të njëjtëve individë, por të vendosur në parti të ndryshme, ku është vrarë gara, meritokracia dhe vlerat e individit, ndërsa është shtuar servilizmi, hipokrizia dhe përkulja ndaj kryetarëve që hartojnë listat, PD nuk ka fituar asnjë palë zgjedhje dhe nuk i fiton kurrë, edhe sikur të bëhen zgjedhje çdo të diel”,-shkruan Murrizi.
