Shkencëtarë nga Observatori Kombëtar i Athinës (NOA) në bashkëpunim me kolegë nga Zelanda e Re kanë realizuar hartëzimin më të plotë ndonjëherë të çarjeve sizmike aktive në territorin e Greqisë kontinentale. Projekti është bazuar në Modelet Dixhitale të Lartësisë (DEM) të siguruara nga Kadastra Greke, me qëllim identifikimin dhe klasifikimin e gjurmëve të çarjeve që ndikojnë në aktivitetin sizmik të vendit.
Si rezultat i këtij studimi shumëvjeçar, ekipi identifikoi qindra çarje të reja dhe përmirësoi me saktësi hartën e atyre tashmë të njohura, duke krijuar AFG (Active Faults Greece) – bazën e parë gjithëpërfshirëse të çarjeve sizmike aktive, e bazuar ekskluzivisht në gjurmën e tyre në reliev. Të dhënat janë publikuar në revistën prestigjioze shkencore “Nature”.
Sipas raportimit të “Protothema”, ekipi i drejtuar nga Dr. John Begg, Dr. Vasiliki Mouslopoulou, Dr. Dave Heron dhe Prof. Andy Nicol deklaron se peizazhi grek, me kontrastet e tij të forta gjeomorfologjike, pasqyron një proces të vazhdueshëm deformimi tektonik.
Ekspertët theksojnë se rreth 3,600 çarje sizmike janë aktive, por shumë prej tyre mbeten të pazbuluara për shkak të mbulimit nga bimësia ose zonat e urbanizuara.
“Greqia, e vendosur midis dy kontinenteve, deformohet vazhdimisht nga lëvizja e Afrikës drejt veriut dhe Euroazisë drejt jugut. Kjo lëvizje shkakton ndryshime të vazhdueshme në topografi nëpërmjet çarjeve aktive, shumë prej të cilave nuk janë të dukshme në sipërfaqe”, shpjegojnë studiuesit.
Në të njëjtën kohë, ata nënvizojnë rëndësinë e njohjes më të thellë të burimeve sizmike, sidomos tani që ekonomia greke mbështetet gjithnjë e më shumë në turizëm dhe vendi synon të kthehet në një qendër energjetike rajonale. Kjo kërkon hartëzim të detajuar të zonave tokësore dhe detare.
AFG përfshin gjithsej 3,815 gjurmë çarjesh, të grupuara në 892 çarje individuale – më shumë se gjysma prej të cilave hartëzohen për herë të parë. Gjithashtu, përfshihen edhe 35 çarje sipërfaqësore të dokumentuara historikisht pas tërmeteve të fuqishme.
Çdo çarje klasifikohet si aktive, potencialisht aktive ose e pasigurt, bazuar në deformimin e relievit dhe sasinë e të dhënave të disponueshme.
Sipas sizmiologëve, më shumë se 2,000 gjurmë rezultojnë aktive, ndërsa rreth 1,600 kategorizohen si potencialisht aktive. Më shumë se gjysma e tyre ndikojnë drejtpërdrejt në rrjedhën e lumenjve, proceset e sedimentimit dhe kufijtë midis vargmaleve dhe luginave.
Megjithatë, studiuesit paralajmërojnë se disa çarje aktive ende mbeten të fshehura, të “varrosura” nën depozita më të reja gjeologjike – një faktor që i bën zonat sizmikisht aktive edhe më të vështira për t’u identifikuar pa analiza të thelluara.
