Mbrojtësi i Barcelonës, Ronald Araujo, aktualisht është jashtë fushës, pasi ka marrë një pushim për t’u marrë me një betejë të shëndetit mendor.
Mbrojtësi uruguaian ka munguar në tre ndeshjet e fundit, dhe tani e ardhmja e tij afatgjatë në klub është vënë në dyshim, pas raporteve më të fundit që vijnë nga Spanja.
Zëvendëskapiteni u përjashtua dy javë më parë në humbjen 3-0 të Barcelonës ndaj Chelseat në Champions League, për çka u përball me shumë kritika. Nuk është hera e parë që ai vihet në qendër të fajësimit te blaugranat.
Javën e kaluar, pasi humbi fitoren ndaj Alaves për shkak të një problemi në stomak, Barcelona i dha Araujo-s një pushim për të rikthyer qetësinë mendore.
Që atëherë, trajneri Hansi Flick ka konfirmuar se ai është në gjendje të mirë fizike për të luajtur, por po merr një pauzë, duke e quajtur një “çështje private”. Barcelona nuk i ka vendosur asnjë afat për t’u kthyer, ndërsa presidenti Joan Laporta e ka quajtur kritikën të padrejtë dhe ka thënë se klubi do ta mbështesë në çdo mënyrë të mundshme.
Ndërkohë, Cadena Cope ka raportuar se situata e Araujo-s është “më serioze se sa mendonim”, duke sugjeruar se ekziston mundësia që ai të mos luajë më për Barcelonën. Ata shtojnë se Araujo ka pësuar disa sulme paniku dhe se morali i tij është aktualisht shumë i ulët – ndaj klubi po i lejon të marrë aq kohë sa i duhet për t’u rikuperuar.
Gjithashtu, Sport ka zbuluar se këtë javë Ronald Araujo ka udhëtuar në Tel Aviv të Izraelit për të qetësuar mendjen për disa ditë. Udhëtimi përshkruhet si “shpirtëror dhe fetar”, dhe besohet se qëndrimi i tij do të jetë i shkurtër.
Araujo nuk është i pari dhe me shumë gjasë nuk do të jetë as i fundit që përballet me probleme të shëndetit mendor në një nga klubet më intensivë në botë. Vetëm këtë verë, lojtari i Real Madridit, Rodrygo Goes, mungoi për një muaj nga ndeshjet teksa kalonte “një periudhë të vështirë”, siç e përshkroi ai vetë. Andres Iniesta është rasti më i njohur i një beteje me shëndetin mendor te Barcelona, por edhe ndihmësi teknik dhe ish-lojtari Bojan Krkic ka folur për sulme paniku.
Pas vdekjes së tij, në biografinë e shkruar nga Ronald Reng për portierin e ndjerë Robert Enke, u zbulua se ai vuante nga depresioni i rëndë edhe gjatë kohës sa ishte te Barcelona – në një epokë pa rrjete sociale, por edhe me shumë më pak mirëkuptim e ndihmë për çështjet e shëndetit mendor.
