Kryetari i Bashkisë së Sarandës, Oltion Çaçi, rezulton të ketë kryer një numër të lartë transaksionesh me pasuri të paluajtshme që prej marrjes së detyrës publike. Të dhënat dalin nga deklarimet e pasurisë të dorëzuara nga vetë ai pranë Inspektoratit të Lartë të Deklarimit dhe Kontrollit të Pasurive (ILDKP) për vitet 2023 dhe 2024.
Sipas këtyre deklarimeve, Çaçi ka shitur ose këmbyer gjithsej 13 pasuri të paluajtshme, përfshirë apartamente, njësi tregtare dhe garazhe, ku figuron bashkëpronar me kuotë 16.667% në secilën prej tyre.
Viti 2023: 6 apartamente “largohen” nga pronësia
Në deklarimin për vitin 2023, kryebashkiaku raporton largimin nga pronësia e 6 apartamenteve, me sipërfaqe që variojnë nga 43 deri në 95 metra katrorë. Në të gjitha rastet, vlera e përfituar është deklaruar 0 lekë, me shënimin “nuk e zotëroj – tjetër”, pa sqarime të mëtejshme mbi formën konkrete të transferimit apo shkëmbimit të këtyre pasurive.
Ky fakt ngre pikëpyetje mbi mënyrën se si janë kryer këto lëvizje pronësie dhe mbi çmimet reale të transaksioneve, në një treg ku pasuritë e paluajtshme, veçanërisht në Sarandë, kanë pësuar rritje të ndjeshme vlerash.
Viti 2024: ritëm edhe më i lartë transaksionesh
Edhe në vitin 2024, sipas deklarimit zyrtar, Çaçi ka vijuar me shitjen e pasurive. Këtë herë bëhet fjalë për 7 pasuri të tjera, përfshirë:
- 5 apartamente
- 1 njësi tregtare
- 1 garazh
Edhe këto pasuri janë deklaruar me kuotë pronësie 16.667%, ndërsa vlerat e raportuara si përfitime janë, në disa raste, simbolike. Për shembull:
- një njësi tregtare prej 70 m² është shitur për 16,753 lekë
- një apartament prej 71.1 m² për 43,178 lekë
- një tjetër apartament prej 63.8 m² për 38,739 lekë
Shuma të tilla janë dukshëm larg çmimeve reale të tregut imobiliar në zonat bregdetare.
Pyetje mbi përputhshmërinë me funksionin publik
Intensiteti i lartë i këtyre transaksioneve ka sjellë që emri i Oltion Çaçit të përflitet publikisht si “Sheiku i Sarandës”, për shkak të rolit aktiv në lëvizjen e pronave, në një kohë kur ai ushtron një funksion të lartë publik.
Megjithëse deklarimet janë formalisht të regjistruara në ILDKP, ritmi i shitblerjeve dhe vlerat e raportuara ngrenë pikëpyetje mbi transparencën, konfliktin e mundshëm të interesit dhe përputhshmërinë e kësaj veprimtarie me detyrën e kryetarit të bashkisë.
Deri më tani, nuk ka një reagim zyrtar nga vetë Oltion Çaçi lidhur me këto të dhëna dhe me mënyrën e realizimit të këtyre transaksioneve.
