Teksa në media është përfolur emri i shkrimtares së njohur Lea Ypi si një kandidate e mundshme për kryeministre e një qeverie teknike në Shqipëri, ka reaguar për herë të parë kreu i PD-së Sali Berisha.
Gjatë një bashkëbisedimi që zhvilloi online me ndjekësit e tij, Berisha tha se Ypi është një shkrimtare e cila është bërë e njohur me veprat e saj.
Por kryedemokrati theksoi gjatë fjalës së tij se qeveria teknike duhet të jetë një qeveri që besohet dhe mbështetet nga të gjitha palët.
“I kam lexuar, po unë nuk mund të bëj një koment. Ajo është një shkrimtare e cila është bërë e njohur me veprat e saj. Nuk kam asnjë dijeni se çfarë pretendimesh ka. Por qeveria teknike do të jetë një qeveri e cila besohet nga të gjitha palët dhe mbështetet nga të gjitha palët”, tha Berisha.
Kujtojmë që një reagim për emrin e Lea Ypit në krye të qeverisë teknike, e dha edhe Genc Gjokutaj, avokati i Sali Berisha. Ai shkruante se pas kësaj ideje, qëndron kryeministri Edi Rama.
