Ministri i Mbrojtjes, Pirro Vëngu, ka komentuar raportimet mbi një marrëveshje të mundshme mes Shqipërisë dhe kompanisë izraelite LBT Systems për furnizimin me armë dhe dronë, në një kohë kur sipas mediave izraelite dhe ndërkombëtare, kompania apo nënkontraktorë të saj janë nën hetim për korrupsion dhe disa kontrata të lidhura me NATO-n raportohet se janë pezulluar.
I pyetur nëse Shqipëria, përveç marrëveshjes për Akademinë e Aviacionit, ka firmosur edhe një kontratë për furnizime ushtarake me këtë kompani dhe sa është kostoja e saj, ministri Vëngu nuk dha një përgjigje konkrete mbi ekzistencën apo vlerën e një kontrate të tillë.
Ai deklaroi se autoritetet shqiptare janë të informuara për hetimet, por theksoi se ato nuk lidhen me aktivitetin institucional të kompanisë, por me individë të caktuar.
Sipas ministrit, këta individë nuk kanë asnjë lidhje me Shqipërinë dhe nuk kanë lidhje me bashkëpunimin mes Shqipërisë dhe Izraelit. Ai hodhi poshtë kritikat e opozitës, duke thënë se po tenton të stigmatizojë një kompani që, sipas tij, është lidere në industrinë e mbrojtjes dhe që vazhdon të bashkëpunojë me vende të NATO-s dhe Bashkimit Evropian.
“Derisa të kemi udhëzime të kundërta nga NATO, edhe ne do të vazhdojmë këtë bashkëpunim,” u shpreh Vëngu.
Megjithatë, mbetet e paqartë një nga çështjet kryesore të interesit publik: nëse Shqipëria ka lidhur realisht një kontratë për furnizim me armë dhe dronë me LBT Systems dhe sa është kostoja e saj për buxhetin e shtetit.
Në një sektor të ndjeshëm si mbrojtja, ku kontratat shpesh mbulohen nga klauzola konfidencialiteti, mungesa e transparencës mbi marrëveshjet e mundshme dhe raportimet për hetime ndërkombëtare ngrenë pikëpyetje mbi standardet e prokurimit, kontrollin institucional dhe përgjegjshmërinë publike.
