Skandali i mbetjeve industriale të KURUM po hyn në një fazë edhe më të rëndë, teksa burime për Ekofin pranë hetimeve bëjnë me dije se rezultatet e analizave laboratorike për mostrat e sekuestruara nuk i klasifikojnë ato thjesht si toksike, por si të dëmshme dhe potencialisht kancerogjene për shëndetin e njeriut. Sipas këtyre burimeve, përqendrimet e substancave të rrezikshme kanë rezultuar ndjeshëm mbi normat e lejuara, duke e zhvendosur çështjen nga një problem administrativ mjedisor në një rrezik real për shëndetin publik dhe sigurinë mjedisore.
Mostrat, të cilat janë analizuar në një laborator jashtë vendit, kanë ngritur alarmin se mbetjet përmbajnë elementë që lidhen drejtpërdrejt me rreziqe serioze shëndetësore, përfshirë ekspozimin afatgjatë ndaj substancave kancerogjene. Pikërisht këto rezultate, sipas burimeve, kanë shkaktuar tensione të forta institucionale dhe përpjekje për të shmangur përgjegjësinë, duke e kthyer dosjen në një “çështje të nxehtë” që askush nuk dëshironte ta mbante.
Në këto kushte, pritet që hetimet penale të mos fokusohen vetëm te aktiviteti i kompanisë, por edhe te roli i institucioneve shtetërore që kishin për detyrë monitorimin dhe kontrollin e mbetjeve të rrezikshme. Burime për Ekofin bëjnë me dije se në sitën e prokurorisë pritet të përfshihen punonjës dhe zyrtarë të KURUM, por edhe zyrtarë të Agjencisë Kombëtare të Mjedisit, të cilët dyshohet se kanë bashkëpunuar me kompaninë për të fshehur për muaj me radhë skandalin e mbetjeve dhe për të tjetërsuar dokumentacionin zyrtar, në këmbim të përfitimeve të paligjshme.
Dyshimet lidhen me mënyrën se si mbetjet janë klasifikuar, me lejet e transportit dhe trajtimit, si dhe me dokumentet shoqëruese që kanë mundësuar lëvizjen e tyre jashtë territorit shqiptar. Sipas burimeve, ekzistojnë indicie se një pjesë e dokumentacionit është ndryshuar ose përshtatur për të shmangur etiketimin e mbetjeve si të rrezikshme, duke i hapur rrugë eksportit të tyre.
Skandali mori përmasa publike pas ndalimit të dy anijeve të nisura nga porti i Durrësit drejt Tajlandës, të cilat u kthyen pas nga autoritetet e huaja pas dyshimeve se në bord ndodheshin mbetje të rrezikshme. Ky episod nxori në pah jo vetëm mungesën e kontrollit efektiv, por edhe një zinxhir të tërë përgjegjësish të paqarta mes kompanive private dhe institucioneve shtetërore.
Gjatë javës së ardhshme, sipas burimeve, pritet zhvillime të forta në lidhje me dosjen hetimore të Kurum dhe për rolin e kompanisë private në skandalin e mbetjeve, si edhe implikimin e zyrtarëve të lartë të AKM në këtë aferë. /ekofin.al
