Autoritetet amerikane kanë intensifikuar kërkimet për Nancy Guthrie, 84 vjeçe, nëna e prezantueses së emisionit “Today” në NBC, Savannah Guthrie, e cila rezulton e zhdukur prej së dielës.
Byroja Federale e Hetimeve (FBI) ka shpallur një shpërblim prej 50,000 dollarësh për çdo informacion që çon në gjetjen e saj ose në arrestimin dhe dënimin e personave përgjegjës për zhdukjen.
“Për momentin, ne besojmë se Nancy Guthrie është ende diku atje”, deklaroi sherifi i Qarkut Pima, Chris Nanos, gjatë një konference për shtyp të enjten në Arizona. Në këtë konferencë morën pjesë edhe zyrtarë të lartë të FBI-së në Arizona, një ditë pasi Presidenti i SHBA-së, Donald Trump, njoftoi se kishte urdhëruar përfshirjen e autoriteteve federale në hetim. Sipas sherifit, hetuesit kanë gjetur gjurmë gjaku në verandën e shtëpisë së Nancy Guthrie në Tucson, ndërsa kamera e ziles së derës ishte shkëputur pak pas orës 1:45 të mëngjesit të së dielës. Analizat laboratorike kanë konfirmuar se gjaku i përket asaj. Deri tani, autoritetet nuk kanë identifikuar asnjë të dyshuar apo person me interes.
Kreu i zyrës së FBI-së në Phoenix, Hayth Jankey, konfirmoi shpërblimin prej 50 mijë dollarësh dhe paralajmëroi për raste mashtrimi. Ai tha se autoritetet kanë kryer tashmë një arrestim ndaj një personi që tentoi të përfitonte nga situata duke paraqitur një kërkesë të rreme për shpërblim. Ndërkohë, prokurorët federalë në Arizona ngritën akuza ndaj një burri, Derrick Callela, i cili dyshohet se tentoi të zhvaturte familjen Guthrie. Sipas padisë, ai u dërgoi mesazhe anëtarëve të familjes duke pretenduar se kishte lidhje me një pagesë në bitcoin. Hetuesit konstatuan se mesazhet nuk kishin lidhje me rrëmbimin dhe se i dyshuari kishte vepruar për të testuar nëse do të merrte përgjigje.
Në një video emocionale të publikuar në Instagram, Savannah Guthrie u bëri thirrje personave që mund të kenë informacion të sigurojnë prova të qarta se nëna e saj është gjallë. “Jetojmë në një botë ku zërat dhe imazhet mund të manipulohen lehtësisht. Duhet të dimë me siguri absolute se ajo është gjallë”, tha ajo. Edhe vëllai i saj, Cameron Guthrie, u bëri thirrje publikisht autorëve të mundshëm që të kontaktojnë familjen.
Nancy Guthrie u raportua e zhdukur të dielën dhe u pa për herë të fundit në shtëpinë e saj në Tucson. Autoritetet lokale kanë deklaruar se ka shenja që ajo është marrë kundër vullnetit të saj, duke e trajtuar rastin si një rrëmbim të mundshëm. Presidenti Trump ka shprehur interes personal për çështjen dhe ka zhvilluar një bisedë telefonike me Savannah Guthrie. Shtëpia e Bardhë konfirmoi se FBI ka angazhuar edhe Ekipin e Reagimit ndaj Incidenteve Kritike, i specializuar në raste rrëmbimi. “Kjo është një grua 84-vjeçare. Ende ka kohë për të bërë gjënë e duhur”, apeloi Jankey. “Ju lutemi, kthejeni Nancy-n në shtëpi.”
