E enjtja nuk është dita e vetme kur deputetët punojnë. Aty ata bëjnë më shumë garë për protagonizëm, ndërsa në atë që duhet të jetë puna e vërtetë, hartimi i ligjeve, dhe që bëhet në komisionet parlamentare, panorama është krejt tjetër.
Shifrat e përpunuara nga VNA, bazuar mbi pagesat që ka bërë Kuvendi për deputetët mbi pjesëmarrjen e tyre në Komisione, tregon se në “tabelën e nderit” janë socialistët dhe deputetë që zakonisht nuk kanë zë të enjteve.
Kjo shpjegohet me faktin se PS nuk i toleron mungesat në komisione dhe miratimi i ligjeve nuk ndodh nëse ata nuk janë, ndryshe nga opozitarët që rezultojnë neglizhentë ndaj mbledhje parlamentare në komisione.
“Kampionët” e komisioneve
Në krye të listës si deputetja më aktive me pjesëmarrje në mbledhje të komisioneve parlamentare rezulton Kiduina Zaka, e cila udhëheq me 18,700 lekë honorare, e ndjekur nga Ornaldo Rakipi me 15,300 lekë. Këto shifra tregojnë se këta deputetë jo vetëm janë anëtarë të disa komisioneve, por kanë pasur një pjesëmarrje konstante në mbledhjet e thirrura gjatë dhjetorit.
Në grupin e “të palodhurve” renditen edhe emra si Ulsi Manja dhe një grup i madh deputetësh që kanë arkëtuar midis 13,600 dhe 14,450 lekësh, duke dëshmuar një prezencë strikte në diskutimet për projektligjet dhe monitorimin e institucioneve.
Heshtja e “zërave të fuqishëm”
Plot 10 deputetë e kanë mbyllur muajin dhjetor me 0 lekë honorare.
Në këtë listë “neglizhente” bien në sy figura peshë të opozitës si Sali Berisha, Gazment Bardhi, dhe Agron Shehaj.
Ndonëse për Berishën situata është e kuptueshme sepse ai nuk është anëtarësuar në asnjë komision, bie në sy mungesa në mbledhje e kreut të grupit parlamentar demokrat apo edhe e kreut të partisë Mundësia.
Megjithëse axhenda e tyre politike mund të jetë e ngjeshur me aktivitete jashtëparlamentare ose bojkot, shifrat zyrtare konfirmojnë se kontributi i tyre në hartimin e ligjeve në komisione gjatë kësaj periudhe ka qenë nul.
________________________________________
TABELA E NDERIT:
Kiduina Zaka
Ornaldo Rakipi
Ulsi Manja
Aulona Bylykbashi
Aurora Mara
Bora Muzhaqi
Erion Malaj
Erjona Ismaili
Klevis Jahaj
Ramion Kurti
LISTA E “MUNGUESVE”
1. Gazment Bardhi
2. Agron Shehaj
3. Albana Vokshi
4. Edi Paloka
5. Elda Hoti
6. Erald Kapri
7. Fatmir Mediu
