Mbi 1.5 miliardë turistë ndërkombëtarë udhëtuan jashtë vendit në vitin 2025, duke hapur rrugën për një vit rekord në 2026. Sipas Barometrit Botëror të Turizmit të publikuar nga Organizata Botërore e Turizmit e OKB-së, ardhjet ndërkombëtare u rritën me 4% globalisht, duke iu afruar mesatares vjetore prej rreth 5% të periudhës 2009–2019. Megjithëse Evropa mbetet rajoni më i vizituar në botë me afro 800 milionë vizitorë dhe rritje 6% krahasuar me 2024, vendet me rritjen më të shpejtë nuk janë destinacionet tradicionale. Brazil shënoi rritje prej 37%, Egypt 20%, Ethiopia 15% dhe Bhutan 30%. Edhe Seychelles regjistroi rritje prej 13%.
Sipas ekspertëve të industrisë, turistët po orientohen gjithnjë e më shumë drejt destinacioneve me identitet të fortë kulturor, peizazhe unike dhe eksperienca autentike, duke shmangur vendet tashmë të mbingarkuara nga turizmi masiv.
Egjipti: muzeu i ri dhe rikthimi i besimit
Rritja e fortë e Egjiptit lidhet kryesisht me hapjen e shumëpritur të Muzeut të Madh Egjiptian pranë Piramidave të Gizës, si dhe me përmirësimin e perceptimit për sigurinë. Operatorët turistikë raportojnë rritje të interesit nga familjet dhe udhëtarët solo, veçanërisht gra. Gjithashtu, po promovohet turizmi më i qetë dhe i personalizuar, si lundrimet me anije tradicionale në Nil në vend të kroçerave të mëdha.
Brazili: politika të reja dhe diversifikim
Brazili ka shënuar rritjen më të madhe vjetore falë politikave për shtimin e fluturimeve ndërkombëtare dhe promovimit global. Ngjarje të mëdha si Lojërat Olimpike, Kupa e Botës dhe aktivitete të tjera sportive kanë rritur dukshmërinë e vendit. Përveç plazheve të njohura, vendi po promovon destinacione të reja dhe përvoja më të ndërgjegjshme, duke shmangur përqendrimin vetëm në qytete si Rio de Janeiro dhe São Paulo.
Etiopia: rikthim pas krizës
Pas disa viteve me rënie për shkak të konfliktit në rajonin e Tigray, Etiopia po përjeton një rikthim të fortë turistik. Investimet në infrastrukturë, hotele dhe promovim ndërkombëtar kanë rritur besimin e vizitorëve. Destinacionet historike si Lalibela dhe malet Simien po tërheqin sërish turistë të interesuar për histori, kulturë dhe natyrë.
Seychelles: përtej muajit të mjaltit
I njohur tradicionalisht si destinacion për çifte, Seychelles po tërheq tani familje dhe turistë të fokusuar te mirëqenia. Vendi thekson mbrojtjen e mjedisit, duke ruajtur 30% të territorit të tij detar dhe duke garantuar se nuk ka plazhe private, çka e bën arkipelagun të aksesueshëm për të gjithë.
Butani: turizëm me vlerë të lartë
Butani vazhdon politikën “vlerë e lartë, volum i ulët”, duke aplikuar një tarifë të përditshme zhvillimi të qëndrueshëm për turistët. Vendi promovon përvoja kulturore dhe shpirtërore autentike, duke u fokusuar te mirëqenia dhe koncepti i Lumturisë Kombëtare Bruto, në vend të rritjes së pakontrolluar të numrit të vizitorëve.
Në përfundim, trendi i vitit 2026 tregon se turistët po kërkojnë përvoja më kuptimplota dhe destinacione më pak të zakonshme, duke zhvendosur vëmendjen nga qendrat tradicionale drejt vendeve në zhvillim me identitet të fortë kulturor dhe natyror.
