Prokuroria spanjolle ka kërkuar 22 vjet burg për italianin Marco Romeo, i akuzuar për vrasjen e partneres së tij shqiptare, Sibora Gagani, në Torremolinos të Spanjës në verën e vitit 2014 dhe fshehjen e trupit të saj për gati nëntë vjet.
Sipas aktakuzës, të dy u njohën në vitin 2009 në Itali dhe në vitin 2010 u zhvendosën për të jetuar në Torremolinos. Pas një ndarje të përkohshme, në korrik të vitit 2014 ata u kthyen sërish të banojnë së bashku në një apartament në zonën e El Calvario.
Prokuroria pretendon se, në një datë midis 7 dhe 14 korrikut të atij viti, i akuzuari qëlloi 22-vjeçaren në banesë me një armë të mprehtë duke i shkaktuar të paktën katër plagë, tre prej tyre në shpinë, që i morën jetën.
Pas krimit, i akuzuari vendosi të fshehë trupin brenda vetë banesës. Për këtë, ai ndërtoi një strukturë në apartament, duke përdorur dru, qese plastike, rërë dhe një substancë bazike, ndoshta gëlqere, me qëllim të mbylljes së strukturës dhe parandalimit të përhapjes së erërave.
