Presidenti amerikan Donald Trump këtë të shtunë mirëpriti liderë nga e gjithë Amerika Latine në samitin e quajtur “Shield of the Americas” (Mburoja e Amerikave) në Florida, ku nënshkroi një marrëveshje për të luftuar aktivitetin kriminal të karteleve në gjithë Hemisferën Perëndimore.
Trump tha se samiti u thirr për të bashkuar aleatë me mendime të ngjashme në rajon, për të promovuar lirinë, sigurinë dhe prosperitetin, mes përpjekjeve për të ndalur narko-terroristët dhe kartelet e trafikut të drogës.
“Në këtë ditë historike, ne bashkohemi për të shpallur një koalicion të ri ushtarak për të çrrënjosur kartelet kriminale që po dëmtojnë rajonin tonë,” tha Trump në event.
“Ne e quajmë këtë partneritet ushtarak Koalicioni i Amerikave Kundër Karteleve,” shtoi ai.
Trump tha se “zemra e marrëveshjes sonë” është angazhimi për përdorimin e forcës ushtarake vdekjeprurëse “për të shkatërruar kartelet ogurzeza dhe rrjetet terroriste” njëherë e përgjithmonë.
“Do t’i heqim qafe,” tha ai.
Presidenti i SHBA-ve gjithashtu inkurajoi liderët pjesëmarrës që të ndërmarrin veprime ushtarake kundër karteleve dhe bandave ndërkombëtare që, sipas tij, paraqesin një “kërcënim të papranueshëm” për sigurinë kombëtare të hemisferës.
“E vetmja mënyrë për t’i mposhtur këta armiq është duke çliruar fuqinë e ushtrive tona,” tha Trump. “Ne duhet të përdorim ushtrinë tonë. Ju duhet të përdorni ushtrinë tuaj.”
Duke përmendur koalicionin e udhëhequr nga SHBA-të që përballoi grupin Shteti Islamik në Lindjen e Mesme, presidenti republikan tha se “tani duhet të bëjmë të njëjtën gjë për të çrrënjosur kartelet në shtëpi.”
Në takim morën pjesë liderët e Argjentinës, Bolivisë, Kilit, Kosta Rikës, Republikës Dominikane, Ekuadorit, El Salvadorit, Guajanës, Hondurasit, Panamasë, Paraguajit dhe Trinidad & Tobagos.
“Të gjitha kombet në këtë sallë ndajnë të njëjtat prioritete: sigurinë, prosperitetin, tregtinë e lirë dhe sundimin e ligjit,” tha Trump.
“Prandaj, së bashku po formojmë edhe Mburojën e Amerikave, një organizatë të re për të avancuar këto prioritete të përbashkëta në hemisferën tonë,” shtoi ai.
Sekretarja e Departamentit të Sigurisë së Brendshme Kristi Noem, të cilën Trump e largoi nga pozicioni dhe e emëroi si të dërguar speciale për koalicionin e ri të kombeve, ishte e pranishme. Sekretari i Shtetit Marco Rubio, Sekretari i Luftës Pete Hegseth, si dhe Sekretari i Thesarit Scott Bessent, gjithashtu morën pjesë.
Zyrtarët e karakterizuan samitin si një koalicion historik që synon forcimin e partneriteteve rajonale dhe avancimin e strategjive të koordinuara për të përballuar sfidat e përbashkëta të sigurisë.
Takimi u zhvillua vetëm dy muaj pasi Trump urdhëroi një operacion ushtarak amerikan për të kapur ish-presidentin e Venezuelës, Nicolás Maduro.
“Ne i shkuam drejt në zemër dhe e morëm nga andej,” tha Trump në samit.
