Një histori prekëse që lidhet me aktorin legjendar Robert Redford po qarkullon gjerësisht në rrjet, duke tërhequr vëmendjen për një gjest të rrallë human që thuhet se ai ka bërë vite më parë gjatë xhirimeve të një filmi.
Sipas rrëfimit, Redford kishte gjetur një çantë të humbur në set, e cila i përkiste një make-up artisteje. Brenda saj ndodheshin dokumente divorci dhe vetëm 19 dollarë – një tregues i qartë i situatës së vështirë që ajo po kalonte në atë periudhë.
Aktori ia ktheu çantën, por bashkë me të kishte lënë edhe një shënim të shkurtër me fjalët: “Vazhdo. Gjërat do të përmirësohen.” Ajo që gruaja nuk e priste ishte një tjetër surprizë e fshehur mes dokumenteve – 5,000 dollarë cash.
Redford nuk e bëri kurrë publik këtë gjest dhe nuk kërkoi asnjëherë vëmendje apo mirënjohje. Megjithatë, sipas historisë, kjo ndihmë rezultoi vendimtare për jetën e gruas, e cila arriti të hapte një biznes të vogël dhe të rindërtonte jetën e saj.
Vite më vonë, pasi kishte arritur sukses, ajo u rikthye në të njëjtin set për t’ia kthyer shumën aktorit, si shenjë falënderimi. Por Redford thuhet se refuzoi, duke i thënë: “Ti i ke fituar.”
Edhe pse nuk ka konfirmim zyrtar për këtë ngjarje, historia është shpërndarë gjerësisht si një shembull i fuqisë së mirësisë dhe ndikimit që një gjest i vogël mund të ketë në jetën e dikujt.
