Kryeministri i Maqedonisë së Veriut, Hristijan Mickoski, njoftoi sot se qeveria ka ulur taksën e vlerës së shtuar (TVSH) për benzinën dhe naftën nga 18 në 10 përqind.
Ai u tha gazetarëve pas seancës së Qeverisë se masa do të hyjë në fuqi në mesnatë të hënën, më 23 mars, do të zgjasë dy javë dhe mund të zgjatet nëse është e nevojshme.
Rezultatet janë të menjëhershme: çmimet e karburanteve në Maqedoninë e Veriut konsiderohen tashmë ndër më të ulëtat në rajon, duke tërhequr edhe qytetarë nga vendet fqinje. Konsumi është rritur me rreth 9%, ndërsa vetëm nga kjo masë qytetarët kursejnë qindra mijëra euro çdo ditë.
Sipas kësaj llogaritjeje, çmimi i benzinës, varësisht nëse distributorët e përdorin zbritjen e rafinerisë OKTA, do të ishte nga 1.37 deri në 1.4 euro për litër benzinë 95 oktane. Për benzinë 98 oktane do të ishte nga 1.4 deri në 1.44 euro për litër, dhe për naftën nga 1.52 deri në 1.55 euro për litër.
“Ky është padyshim çmimi më i ulët i karburantit në rajon”, tha Mickoski.
Ai theksoi se Maqedonia e Veriut, për shkak se ka çmimet më të ulëta të karburantit në rajon, është nën presion nga qytetarët e vendeve fqinje që vijnë dhe furnizohen me karburant.
“Konsumi është afërsisht nëntë për qind më i lartë se zakonisht, që do të thotë se rreth 150,000 litra po konsumohen shtesë nga qytetarët e vendeve fqinje. Presioni më i madh është në komunat kufitare të Dibrës, Strugës dhe Ohrit në kufirin perëndimor, Manastirit dhe Gjevgjelisë në kufirin jugor dhe Kumanovës në kufirin verior”, tha Mickoski.
Në kontrast, në Shqipëri nuk është ndërmarrë asnjë hap i ngjashëm fiskal për të ulur barrën mbi konsumatorët, qeveria po lejon distributorët të rrisin çmimet, pa ndërhyrje konkrete përmes taksave apo mekanizmave rregullatorë. Aktualisht çmimi i naftës në vend është 214 lekë për litër, një shifër shumë më e madhe se vendet e tjera në rajon.
Po çfarë efekti ka ulja e taksës në shtetin fqinj?
Kryeministri Mickoski e ka përgjigjen:
“Po u kursejmë këtyre qytetarëve afërsisht 200,000 euro në ditë ose rreth një milion e gjysmë euro në javë, duke marrë parasysh që konsumi mesatar është rreth një milion e gjashtëqind mijë litra, nga të cilat një milion e dyqind mijë janë naftë, dhe 400,000 të tjerat janë benzinë me oktan 95 dhe 98”.
Ndërkohë në vendin tonë qytetarët jo vetëm që nuk kursejnë për karburantin por përkundrazi po harxhojnë më shumë nga sa kanë harxhuar më parë, gjë kjo që tregon qartë edhe njëherë se qeveria nuk shqtësohet aspak për xhepin e për mirëqënien e shqiptarëve.
