Një gjen i veçantë që ndihmon jakët të mbijetojnë në lartësi të mëdha mund të hapë rrugë për trajtime të reja ndaj sklerozës së shumëfishtë (MS), sipas një studimi të ri. Shkencëtarët zbuluan se një mutacion gjenetik, që u mundëson këtyre kafshëve të jetojnë në kushte me oksigjen të ulët, mund të ndihmojë në riparimin e dëmtimeve nervore.
Studimi, i publikuar në revistën Neuron, identifikoi një mekanizëm natyror që nxit rigjenerimin pas dëmtimit të nervave. Studiuesit besojnë se kjo mund të çojë në trajtime të reja duke përdorur molekula që tashmë ekzistojnë në trupin e njeriut.
Sipas profesorit Liang Zhang, evolucioni ofron një shumëllojshmëri gjenesh që ndihmojnë organizmat të përshtaten me mjedise të ndryshme. Ai thekson se ende ka shumë për të mësuar nga këto përshtatje natyrore.
Një rol kyç në këtë proces luan mielina, shtresa mbrojtëse që rrethon fijet nervore në tru dhe palcën kurrizore, duke mundësuar transmetimin e sinjaleve nervore. Dëmtimi i saj lidhet me sëmundje si paraliza cerebrale tek foshnjat dhe skleroza e shumëfishtëtek të rriturit. Edhe ulja e qarkullimit të gjakut në tru, shpesh e lidhur me plakjen, mund të ndikojë negativisht në mielinë.
Studimi u përqendrua te një gjen i quajtur Retsat, i cili gjendet te kafshët që jetojnë në Rrafshnaltën Tibetiane. Eksperimentet me minj treguan se ata që mbanin këtë mutacion kishin kujtesë dhe funksione më të mira, si dhe nivele më të larta mieline.
Pas dëmtimit, mielina tek këta minj u rigjenerua më shpejt dhe më plotësisht. Kjo lidhej me nivele më të larta të ATDR, një substancë që rrjedh nga vitamina A dhe ndihmon në prodhimin e qelizave që formojnë mielinën.
Kur ATDR iu dha minjve me një sëmundje të ngjashme me MS, simptomat u lehtësuan dhe lëvizshmëria u përmirësua. Studiuesit sugjerojnë se kjo qasje mund të ofrojë një alternativë ndaj trajtimeve aktuale, duke përdorur mekanizma natyrorë të trupit për të luftuar dëmtimin e mielinës.
