E keni parasysh si janë barnat në Shqipëri? Cilësia shpesh e diskutueshme dhe çmimi skandaloz. E keni parasysh gjithashtu çfarë heqin pensionistët për të marrë një rimbursim që në letër duket i thjeshtë, por në praktikë është një rrugë e gjatë dhe e lodhshme.
Mesa duket vetëm ministrja nuk e ka idenë. Ndërkohë që qytetarët përballen çdo ditë me farmacitë dhe faturat e kripura të ilaçeve, ajo shëtit deri në Romë për t’u takuar me ata që këtë problem e kanë zgjidhur prej vitesh. Poston foto dhe ende nuk e ka kuptuar se në Shqipëri mafia e barnave është po aq e rrezikshme sa ajo e AKSHI-t dhe se zgjidhja nuk gjendet në fotot me filtra të Evis Salës.
Sipas njoftimit zyrtar, në Romë u zhvillua një “takim konstruktiv” mes ministres së Shëndetësisë dhe Mirëqenies Sociale, prof. Evis Sala dhe Agjencisë Italiane të Barnave (AIFA). Një moment, thuhet, i rëndësishëm për reformën farmaceutike në Shqipëri dhe për rrugën drejt integrimit europian.
Prioriteti i ministrisë – gjithnjë sipas deklaratës – është modernizimi, forcimi i aksesit të pacientëve në barna të sigurta dhe cilësore, si dhe përafrimi i legjislacionit me acquis të Bashkimit Europian dhe me detyrimet e procesit të integrimit.
Në takim u diskutua edhe për një kuadër të ardhshëm bashkëpunimi institucional, përfshirë një Memorandum Mirëkuptimi që është ende në diskutim, për të forcuar bashkëpunimin në fusha që tingëllojnë shumë teknike: nga Vlerësimi i Teknologjive Shëndetësore (HTA) dhe farmakovigjilenca, deri te politikat rregullatore dhe standardet e cilësisë.
Me pak fjalë, një partneritet “i vlefshëm” që pritet të ndihmojë në ndërtimin e një sistemi farmaceutik më të qëndrueshëm, më transparent dhe plotësisht europian.
Ndërkohë, në Shqipëri, pensionistët vazhdojnë të bëjnë llogaritë: sa kushton ilaçi, sa rimbursohet dhe sa u mbetet nga pensioni pasi dalin nga farmacia. Por të paktën kemi fotografitë nga Roma – me filtra dhe me flamuj./vna
