Një studim i kohëve të fundit që përfshin të dhëna të reja gjenetike dhe arkeologjike tregoi se Neandertalët e fundit në Evropë pësuan një ndryshim të popullsisë që rezultoi në një rënie në ndryshueshmërinë e gjeneve të Neandertalëve menjëherë para zhdukjes së tyre – rreth 40,000 vjet më parë.
Në këtë studim, një ekip ndërkombëtar kërkimor i udhëhequr nga Profesor Cosimo Post (Cosimo Posth) nga Qendra Senkenberg për Evolucionin Njerëzor dhe Paleo-Mjedisin në Universitetin e Tübingen, arriti në rezultate që tregojnë ndryshime dramatike në historinë gjenetike të Neandertalëve evropianë.
Artikulli paraqet rezultatet e analizave të ADN-së mitokondriale të dhjetë individëve Neandertalë, përfshirë Neandertalin nga shpella Pešturina pranë Nishit. U vërtetua se Neandertalët e hershëm nga Pešturina, Shpella Stajnia në Poloni dhe Shpella Mezmajskaya në Rusi ishin gjenetikisht mjaft të ndryshëm, por se homogjenizimi i tyre ndodhi më vonë.
Rezultatet e analizave gjenetike dhe materialit të gjerë arkeologjik treguan se në fillim të ftohjes klimatike 75,000 vjet më parë, kishte një grumbullim të grupeve të Neandertalëve në zonën e Francës jugperëndimore dhe se kjo popullatë u përhap në pjesë të tjera të Evropës 65,000 vjet më parë. Të gjithë Neandertalët e vonë janë pasardhës të asaj linje.
Hulumtimet kanë treguar gjithashtu se numri i Neandertalëve u ul ndjeshëm 45,000 vjet më parë. Sipas autorëve të studimit, mungesa e diversitetit gjenetik dhe izolimi gjeografik i Neandertalëve të mbetur mund të kenë ndikuar ndjeshëm në zhdukjen e tyre përfundimtare rreth 40,000 vjet më parë.
