Erërat e forta që frynë me shpejtësi mbi 100 kilometra në orë në Slloveninë veriore gjatë natës shkaktuan dëme të konsiderueshme materiale, duke rrëzuar pemë mbi rrugë, dëmtuar çati, shenja trafiku dhe stacione autobusi. Stuhia preku sidomos zonën e qytetit të Kranjit, ku ekipet e zjarrfikësve dhe shërbimeve civile punuan gjatë gjithë natës për të menaxhuar situatën.
Pamjet e dëmeve tregojnë rrëzimin e pemëve , dëmtime të çative dhe pengesa të tjera në infrastrukturë, duke krijuar një situatë të vështirë për qytetarët. Në terren ndodhet edhe kryetari i qytetit, Matjaž Rakovec, i cili po monitoron pasojat e stuhisë.
Agjencia sllovene e mjedisit ARSO njoftoi se paralajmërimi i kuq për veriun e vendit do të ulet në portokalli gjatë mbrëmjes dhe në të verdhë për ditën e nesërme, ndërsa erërat pritet të dobësohen gradualisht gjatë ditës.
Autoritetet paralajmërojnë qytetarët të qëndrojnë në ambiente të mbyllura dhe të tregojnë kujdes maksimal për sigurinë personale gjatë kohës së erërave të forta.
