Aktori legjendar Sylvester Stallone, një nga figurat më ikonike të kinemasë botërore, ka reflektuar mbi jetën, karrierën dhe plagët e së shkuarës në një intervistë të fundit për ‘La Repubblica’, duke zbuluar anën më njerëzore të personazheve që e bënë të pavdekshëm.
Për më shumë se pesë dekada, Stallone ka ndërtuar një trashëgimi të jashtëzakonshme në Hollywood, duke krijuar figura si Rocky Balboa dhe John Rambo. Sipas tij, këta personazhe nuk janë thjesht heronj aksioni, por përfaqësojnë diçka më të thellë: ‘Rocky dhe Rambo janë si fëmijë të refuzuar nga nëna e tyre, Amerika… njësoj si unë’.
Ai thekson se forca e këtyre figurave qëndron pikërisht tek dobësia e tyre: ‘Nëse një personazh është i pathyeshëm dhe nuk ndjen asgjë, publiku nuk lidhet me të. Rocky dhe Rambo kanë frikë, janë të trishtuar, dhe kjo i bën njerëzorë’.
Në projektin e tij më të fundit, serialin Tulsa King, Stallone vazhdon të eksplorojë këtë dimension emocional. Ai shpjegon se sfida kryesore ishte të krijonte një personazh gangsteri ndryshe nga stereotipet: ‘Askush nuk është ishull më vete. Sëmundja më e rëndë është vetmia. Izolimi është gjëja më e trishtë që ekziston’.
Jeta personale e aktorit ka qenë po aq e vështirë sa historitë që ka treguar në ekran. Ai rrëfen një fëmijëri të dhunshme dhe të ftohtë emocionalisht: ‘Nga nëna ime nuk kam marrë kurrë një përqafim’. Kjo mungesë dashurie e shtyu drejt aktrimit, si një mënyrë për të fituar kontroll mbi jetën e tij.
Suksesi nuk erdhi lehtë. Për shkak të një dëmtimi në lindje që i ndikoi fytyrën dhe të folurën, Stallone u refuzua shpesh në fillimet e karrierës. Por këmbëngulja e tij dha fryte kur shkroi historinë e ‘Rocky’-t, të frymëzuar nga një ndeshje reale boksi. ‘Është luftë për mbijetesë. Vetëm të fortët mbijetojnë’, shprehet ai.
Megjithatë, sot ai e sheh jetën me një perspektivë më të qartë. Familja ka marrë një rëndësi të re: ‘Dëgjoni fëmijët tuaj, duajini. Një ditë nuk do të jeni më këtu’. Për të, fama është një ‘gjendje e dehshme’, por zgjedhja mbetet gjithmonë njerëzore: të jesh i mirë ose i keq me të tjerët. Stallone lë një mesazh që përmbledh filozofinë e tij: ‘Askush nga personazhet që kam dashur vërtet nuk ka vdekur. Kurrë’.
