Sipas një raporti të publikuar nga media çeke “KIWI.com”, në vitin 2026 turizmi global po lëviz nga destinacionet e mbipopulluara drejt vendeve që ofrojnë përvoja autentike, natyrë të paprekur dhe kultura unike, dhe Shqipëria po del në krye të këtij trendi.
Me brigjet e kristalta të detit Jon, fshatrat malore të qeta dhe mikpritjen tradicionale, vendi po shndërrohet shpejt në një nga destinacionet më premtuese të Mesdheut.
Raporti thekson se në vitin 2025 Shqipëria priti rreth 12.47 milionë vizitorë të huaj, një rritje prej 6,6% krahasuar me vitin e mëparshëm, duke treguar një rritje të qëndrueshme të interesit ndërkombëtar.
Media çeke vëren se transformimi i turizmit shqiptar lidhet ngushtë me investimet në infrastrukturë.
Hapja e Tunelit të Llogorasë në korrik 2024 ka shkurtuar kohën e udhëtimit drejt Rivierës Shqiptare nga 30 minuta në vetëm 7, ndërsa zgjerimi i autostradës Tiranë-Durrës dhe ndërtimi i portit të Porto Romanos kanë përmirësuar ndjeshëm qarkullimin e turistëve dhe tregtinë.
Në të njëjtën kohë, rritja e fluturimeve direkte dhe planet për një aeroport të ri në jug pritet të lehtësojnë më tej udhëtimin ndërkombëtar.
KIWI.com gjithashtu nënvizon hyrjen e investitorëve të mëdhenj privatë: grupet hotelierë si Marriott, Hilton, Radisson, Meliá dhe Hyatt po zgjerohen në Shqipëri, ndërsa një resort luksoz prej 1.4 miliardë dollarësh në ishullin e Sazanit tregon besimin e investitorëve globalë në potencialin e vendit.
Çfarë e bën Shqipërinë kaq të veçantë?
Përveç natyrës dhe kulturës, çmimet e përballueshme e bëjnë vendin një alternativë tërheqëse ndaj destinacioneve tradicionale të Mesdheut.
Shpenzimi mesatar ditor është rreth 427 euro, shumë më i ulët se në Itali apo Greqi, ndërsa turizmi jashtë sezonit veror po rritet me 7%, duke e kthyer Shqipërinë në një destinacion tërheqës gjatë gjithë vitit.
Raporti tërheq vëmendjen edhe tek atraksionet kryesore: Riviera Shqiptare me plazhet spektakolare si Ksamil, Dhërmiu dhe Jala; Alpet Shqiptare dhe shtigjet e bukura për ecje si Theth-Valbonë; qytetet historike të UNESCO-s si Berati dhe Gjirokastra; si dhe gastronomia autentike shqiptare me produkte të freskëta dhe verëra cilësore vendase.
Sipas KIWI.com, kombinimi i natyrës së paprekur, kulturës autentike, çmimeve të përballueshme dhe investimeve strategjike po e pozicionon Shqipërinë si një nga destinacionet turistike më premtuese në botë, dhe ata që vizitojnë tani kanë mundësinë të përjetojnë këtë “shpërthim” turistik përpara se vendi të bëhet një nga pikat më të kërkuara globale.
