Barazim 1-1 mes Bylis dhe Dinamos në ndeshjen e Superiores. Ballshiotët shënuan të parët me Camara, pas vetëm 10 minutash lojë. Skuadra e Mirel Josës mbeti me një lojtar më pak pas daljes me karton të kuq të Përndecës në minutën e 55-të.
Pas 13 minutash, numri i lojtarëve në fushë u barazua, pasi te dinamovitët u ndëshkua me të kuq Goudiaby. Goli i Andre Teixeira 7 minuta nga fundi i dhuroi një pikë Dinamos. Ekipi i Dajës është në vendin e katërt ndërsa Bylis pozicionohet e parafundit.
Kartonat e kuq
Pjesa e dytë e ndeshjes së Kategorisë Superiore mes Bylisit dhe Dinamos në Ballsh, është shënuar nga kartonët e kuq për të dy skuadrat.
Fillimisht ishte Fabjan Përndreca ai i cili u ndëshkua me të kuq në radhët e Bylisit, duke lënë ekipin e tij me 10 vetë. Më pas, e kishte radhën Bakari Gudiabi i Dinamos ai i cili barazoi numrin e lojtarëve të të dy skuadrave në fushë, pasi edhe ai mori të kuq për dy të verdha shumë të shpejta.
Në fakt, ai u ndëshkua dy herë brenda 2 minutash, duke nervozuar jo pak kapitenin Dita i cili turfulloi kundër tij dhe kritikoi shokun e skuadrës. Gudiabi ndërkohë nuk ia kurseu dhe iu kthye Ditës, i cili përveç të tjerave po mundohej ta largonte nga fusha për të rifilluar ndeshjen, meqë Dinamo ishte në disavantazh.
Pas disa momentesh tensioni, Gudiabi la fushën e lojës dhe skuadrat në barazi numerike sa i përket futbollistëve të pranishëm në secilin ekip në lojë.
