Një projektligj i ri për parandalimin e pastrimit të parave të pista është hedhur për konsultim ditët e fundit. Nisma synon të përafrohet ndaj detyrimeve që rrjedhin nga procesi i integrimit evropian, dhe për herë të parë integrohen rregulla strikte për asetet virtuale.
Sipas kësaj dispozite, çdo transfertë e kriptoaseteve duhet të shoqërohet me informacion të plotë, të verifikuar dhe të pandryshueshëm mbi identitetin e dërguesit dhe të përfituesit.
Një shtyllë qendrore e projektligjit është edhe forcimi i kontrollit mbi lëvizjen e parasë cash dhe instrumenteve të ngjashme, përfshirë metalet e çmuara dhe kartat e parapaguara.
Në pikat kufitare sanksionohet detyrimi i deklarimit për çdo shumë të barabartë ose më të madhe se 10,000 euro. Autoritetet doganore fitojnë te drejtën për të bllokuar përkohësisht fondet, edhe nën këtë prag, nëse ekzistojnë indicie për lidhje me veprimtari kriminale.
Lidhur me transaksionet e brendshme, vendoset një kufi maksimal prej 10,000 eurosh për pagesat me para në dorë në transaksionet tregtare brenda vendit.
Ligji vendos edhe detyrime raportimi të bazuara në pragje vlere për blerjet e mallrave të luksit: për mjete motorike mbi vlerën 250,000 euro dhe mjete lundruese e fluturuese mbi vlerën 7.5 milionë euro.
