Një zbulim i pazakontë është raportuar në Kolumbi, ku një fermer nga rajoni i Antiokias ka hasur në një sasi të madhe parash të varrosura në tokën e tij gjatë punimeve bujqësore.
Sipas mediave ndërkombëtare, 65-vjeçari Jose Mariena Cartolos po hapte një kanal për ujitje kur hasi në disa fuçi metalike të ndryshkura, të varrosura më shumë se një metër nën sipërfaqe. Brenda tyre, ai gjeti qindra pako me kartëmonedha, kryesisht dollarë amerikanë, të ruajtura në kushte të mira.
Gjatë gërmimeve, fermeri vuri re edhe disa kontejnerë të mëdhenj, të cilët rezultuan të mbushur plot me para. Vlera e përgjithshme e shumës së gjetur raportohet të arrijë deri në 600 milionë dollarë.
Dyshohet se këto para mund të lidhen me pasuritë e fshehura të Pablo Escobar, i cili njihej për praktikën e varrosjes së shumave të mëdha parash në vende të ndryshme në të gjithë vendin. Sipas disa vlerësimeve, një pjesë e konsiderueshme e pasurisë së tij, që arrinte në dhjetëra miliarda dollarë, nuk është gjetur ende.
Megjithatë, sipas ligjit kolumbian, fermeri nuk pritet të përfitojë nga kjo pasuri. Autoritetet pritet të marrin në administrim shumën e gjetur dhe ta përdorin për programe sociale dhe zhvillimore.
Ndërkohë, mediat kanë spekuluar se ky zbulim mund të rrisë interesin për zona të caktuara të Kolumbisë, duke nxitur një valë kërkimesh për thesare të tjera të mundshme të fshehura që datojnë nga periudha e trafikut të drogës.
