Të paktën derisa vendimi i fundit të rrijë në fuqi, në Festivalin e Filmit në Kanë nuk do shohim fustane transparente apo tejet voluminozë!
Jo më larg se të Martën, u njoftua “se për arsye të qenësishme, nuditeti është i ndaluar në tapetin e kuq dhe çdo pjesë tjetër ku mbahet ky festival”.
Ky vendim ka shkaktuar bujë duke qenë se fustanet që ekspozojnë shumë format trupore janë kthyer në fenomen normal në evente të tilla. Vitin e fundit përshembull, supermodelja Bella Hadid veshi një fustan sensual të Saint Laurent, trend që ndër vite e kanë ndjekur Isabelle Huppert, Naomi Campbell apo Kendall Jenner.
Një grua që vishet në mënyrë modeste dhe mbulon kokën nuk lejohet e po ashtu një grua me fustan transparent shihet si diçka e pahijshme. Pra, tanimë duhet një veshje si një “e mesme e artë”… Por prapë është e pakuptueshme! Janë ndaluar edhe fustanet me bisht të gjatë…Këtu shtrohet pyetja: Për çfarë shërben në thelb tapeti i kuq?!
Në vitet e fundit të paktën, tapeti kuq shihet si një formë reklamimi e personazheve të famshëm ku secili investon punë e para te stilistët më të njohur për t’u dukur sa më bukur. Met Gala është shembulli më ekstrem i këtij fenomeni. Megjithatë, në një kohë kur filmat vlejnë po aq sa moda, nuk e dimë sa do zbatohet ky kod veshjeje dhe a do vlejë për çdo yll.
