Një udhëtim rrugor është gjithmonë një përvojë e bukur, por bëhet edhe më i paharrueshëm kur shoqërohet me peizazhe që të lënë pa frymë. Pikërisht për të zbuluar se cilat vende ofrojnë pamjet më mbresëlënëse gjatë udhëtimeve me makinë, platforma ndërkombëtare e makinave me qira DiscoverCars zhvilloi një sondazh me 6,449 drejtues nga e gjithë bota. Ata u pyetën të vlerësonin bukurinë e vendeve që kanë vizituar, nga 1 deri në 10, dhe më pas u përpilua një renditje me mesataren për çdo shtet.
Në krye të listës doli Irlanda, me një vlerësim mesatar prej 9.52 pikësh. E njohur si “Ishulli i Gjelbër”, Irlanda ofron peizazhe të gjelbëruara, të paprekura nga dora e njeriut dhe rrugë bregdetare si Wild Atlantic Way, që shtrihet nga veriu në jug të vendit. Në vendin e dytë u rendit Zelanda e Re, një vend që prej kohësh cilësohet si një nga më të bukurit në botë për natyrën e tij të papërshkrueshme. Portugalia dhe Mbretëria e Bashkuar ndanë vendin e tretë, falë bregdetit mahnitës të Algarve dhe zonave malore si Highlands të Skocisë apo Lake District në Angli.
Renditja vazhdon me Kroacinë në vendin e pestë, ndjekur nga Greqia, Polonia, Italia, Qipro, Franca, Spanja, SHBA dhe Mauritius. Ky sondazh vërteton edhe një herë se natyra mbetet një nga pasuritë më të mëdha për çdo vend dhe se përvoja e udhëtimit nuk varet vetëm nga destinacioni, por edhe nga rruga që ndjek për të mbërritur atje.
