Australia po bëhet vendi i parë në botë që heq të gjitha kufizimet mbi aktivitetin seksual për dhurimin e plazmës, duke shënuar një ndryshim të rëndësishëm në politikat e dhurimit të gjakut.
Duke filluar nga 14 korriku, rregullat që ndalonin burrat gej dhe biseksualë seksualisht aktivë, si dhe grupet e tjera të konsideruara me rrezik më të lartë për HIV, do të revokohen.
Ndryshe nga SHBA dhe Mbretëria e Bashkuar, të cilat kanë zbutur rregullat, Australia po shkon edhe më tej duke i hequr kufizimet për dhurimin e plazmës.
Sipas Lifeblood, Shërbimi Kombëtar i Dhurimit të Gjakut, tani çdokush me vetëm një partner seksual gjatë gjashtë muajve të fundit do të kualifikohet për të dhuruar gjak, pavarësisht gjinisë apo orientimit seksual.
Ata që kanë pasur më shumë se një partner në gjashtë muajt e fundit do të duhet të presin tre muaj për të dhuruar gjak, por do të mund të dhurojnë plazmë menjëherë. Po ashtu, personat që përdorin medikamente për parandalimin e HIV-it (PrEP) do të lejohen të dhurojnë plazmë, edhe pse ende nuk mund të dhurojnë gjak.
I vetmi përjashtim do të jenë personat me HIV ose ata që kanë partner me HIV, të cilët nuk do të mund të dhurojnë as plazmë.
Rregullat për plazmën hyjnë në fuqi më 14 korrik 2025, ndërsa rregullat e reja për dhurimin e gjakut pritet të zbatohen nga viti 2026.
Lifeblood vlerëson se kjo reformë, e miratuar nga autoriteti kombëtar i produkteve shëndetësore, do të shtojë deri në 625,000 dhurues të rinj.
Në një kohë kur kërkesa globale për plazmë është më e larta ndonjëherë, ndryshimi pritet të sjellë një rritje të ndjeshme në furnizimin me gjak dhe produkte të tij.
