Ndërsa temperaturat e verës vazhdojnë të rriten në të gjithë Evropën, zjarre të shumta dhe valë ekstreme të të nxehtit kanë shpërthyer në rajone të ndryshme në të gjithë kontinentin.
Një valë e të nxehtit në Turqi e çoi temperaturën mbi 40 gradë Celsius, duke krijuar kushte të rrezikshme.
Zjarret shpërthyen në Izmir, Bursa, Tekirdag, Sakarya dhe Adana, duke nxitur reagime emergjente.
Bëhet e ditur se ekipet tokësore dhe ajrore të zjarrfikësve u vendosën për të luftuar flakët, shkruan euronews.
Përpjekjet u përballën me një pengesë tragjike në Adana pasi një aeroplan zjarrfikës u rrëzua ndërsa përpiqej të merrte ujë nga një digë aty pranë.
Operacionet e kërkim-shpëtimit janë aktualisht në zhvillim e sipër.
Në Greqi, shumë athinas nxituan për në plazhe ndërsa vala e parë e madhe e të nxehtit të vitit goditi vendin.
Nxehtësia atje do të intensifikohet deri të premten, duke arritur kulmin në rreth 40-41 gradë Celsius.
Vala e të nxehtit pritet të zgjasë deri në fund të javës, kur parashikohet të ulen temperaturat.
Ndërkohë, turistët dhe vendasit si në Spanjë ashtu edhe në Portugali po përgatiten për nxehtësinë këtë fundjavë, pasi temperaturat atje gjithashtu pritet të rriten ndjeshëm.
Portugalia mund të përjetojë temperatura ekstreme deri në 44 gradë Celsius.
Shërbimi meteorologjik portugez lëshoi një paralajmërim për mot të nxehtë për të gjithë Portugalinë.
Një paralajmërim i verdhë u lëshua për pjesën më të madhe të vendit dhe portokalli për disa rajone të brendshme me rrezik të veçantë nga temperaturat e larta.
Autoritetet u kanë kërkuar qytetarëve të qëndrojnë vigjilentë dhe të shmangin aktivitetet që mund të shkaktojnë zjarre, duke paralajmëruar se kushtet e thata dhe erërat e forta mund të vazhdojnë të ushqejnë flakët.
