Teleskopi Hapësinor Hubble ka realizuar fotografinë më të mirë deri më tani të një komete ndëryjore që po udhëton me shpejtësi të lartë përmes sistemit tonë diellor, duke ardhur nga një tjetër yll jashtë sistemit tonë.
Kometa, e quajtur 3I-Atlas, është vetëm objekti i tretë ndëryjor i njohur që kalon pranë Tokës. Ajo u zbulua muajin e kaluar nga një teleskop në Kili dhe, sipas NASA-s dhe Agjencisë Hapësinore Evropiane që publikuan imazhet e fundit të enjten, nuk përbën asnjë kërcënim për planetin tonë.
Hubble ka zbuluar një re pluhuri në formë pikash loti që rrethon bërthamën e saj, si dhe një bisht pluhuri që tregon drejtimin e lëvizjes së kometës. Fillimisht u mendua se bërthama e saj kishte dhjetëra kilometra në diametër, por vëzhgimet më të fundit e kanë ngushtuar këtë përmasë në vetëm 5.6 kilometra, me mundësinë që të jetë edhe më e vogël, deri në 320 metra.
Kometa po udhëton me një shpejtësi marramendëse prej 209,000 kilometrash në orë, por do të kalojë më afër Marsit sesa Tokës, duke mbajtur një distancë të sigurt nga të dy planetët.
Në momentin kur Hubble realizoi imazhin, ajo ndodhej rreth 446 milionë kilometra larg nga Toka.
Zbulimi i 3I-Atlas konsiderohet një moment i rëndësishëm për astronominë moderne, duke ofruar mundësi unike për të studiuar objekte që vijnë nga sistemet yjore përtej Diellit tonë.
