Në 2022, kryeministri Edi Rama zhvillonte takime me miliarderin Changpeng Zhao, kreun e kompanisë globale të monedhave digjitale Binance. Tre vite më vonë, qytetarët shqiptarë po bien pre e një skeme mashtruese që po operon aktualisht në vend ku është e përfshirë pikërisht kompania e Zhao. Takimi, i bërë publik nga vetë Zhao në atë kohë, u përshkrua si një hap drejt promovimit të adoptimit të kriptomonedhave në Shqipëri.
Në gusht 2025 doli në pah se një platformë e rreme investimi e quajtur TXEX përdor pikërisht reputacionin e Binance për të mashtruar qytetarët shqiptarë. Sipas raportimeve, mbi 6,000 shqiptarë janë prekur nga kjo skemë, me humbje totale të majme.
TXEX operon pa licencë dhe përdor rrjete sociale si Telegram, Signal dhe WhatsApp për të joshur viktimat. Skema fillon me reklama joshëse në Instagram dhe TikTok, ku individë anonimë prezantohen si ekspertë financiarë dhe krijojnë grupe investimesh të sajuara. Viktimat inkurajohen të investojnë fillimisht në platforma të vërteta si Binance, por fondet më pas transferohen tek TXEX, ku fitimet duket se rriten çdo ditë. Kur kërkojnë të tërheqin paratë, përdoruesve u kërkohet të paguajnë tarifa shtesë, duke rritur humbjet.
Autoritetet shqiptare nuk kanë ndërmarrë ende masa konkrete, ndërsa TXEX nuk figuron në QKB, nuk ka licencë nga Banka e Shqipërisë apo AMF dhe operon pa adresë fizike. Skema është denoncuar edhe nga Autoriteti Mbikëqyrës Financiar i Zelandës së Re (FMA), i cili e lidhi TXEX me rrjetin ndërkombëtar “2139 Exchange”.
Ndërkohë që në 2023, qeveria amerikane i dha një goditje masive firmës Binance ku firma ra dakord që paguajë një gjobë prej rreth 4 miliardë dollarësh, ndërsa themeluesi dhe shefi i kompanisë Changpeng Zhao u deklarua fajtor për një krim që lidhej me dështimin e tij për të parandaluar pastrimin e parave në platformë.
Në bazë të marrëveshjes, Departamenti amerikan i Thesarit tha se Binance do t’i nënshtrohej vëzhgimit për pesë vite, mes të tjerash, edhe sigurimin e largimit të plotë të firmës nga Shtetet e Bashkuara. Binance është një kompani me qendër në Ishujt Cayman.
Sipas raportimeve kompania lejoi mbi 1.5 milionë dollarë shkëmbime me monedha virtuale çka bie ndesh me sanksionet amerikane, përfshirë veprimtaritë nga Brigadat al-Qassam të Hamasit, al-Kaida dhe organizata të tjera kriminale.
Ndërkohë shumë nga viktimat shqiptare kanë raportuar se janë detyruar të dërgojnë dokumente personale dhe identitet të falsifikuar, duke rritur shqetësimet për privatësinë dhe keqpërdorimin e të dhënave. Disa dyshojnë se administratorët janë nga Lezha, dhe kërkojnë ndërhyrje të menjëhershme nga Policia Shqiptare.
Kjo skemë tregon qartë se ndërkohë që Rama promovonte kriptomonedhat në 2022, qytetarët shqiptarë janë lënë të ekspozuar ndaj mashtrimeve të sofistikuara. Takimet luksoze dhe fotografitë me miliarderët nuk i kanë mbrojtur shqiptarët nga humbjet e mëdha, përkundrazi, duket se kanë hapur rrugën për skema që i shkatërrojnë familjet dhe kursimet e tyre.
