Nga Cheryl K. Chumley, WASHINGTON TIMES
Presidenti Trump, vetëm pak ditë pas vrasjes së Charlie Kirk, tha në një intervistë fundjave për NBC se “sugar daddy” i demokratëve, George Soros, është “një njeri i keq” që duhet “të futet në burg” për rolin e tij në financimin e atyre që janë akuzuar — megjithëse janë mohuar nga miliarderi — si disa prej kryengritjeve më të dhunshme në vend. Më herët, Trump ka kërcënuar ta hetojë Sorosin për shkelje të Ligjit për Organizatat e Korruptuara e të Ndikuara nga Krimi i Organizuar (RICO).
Soros padyshim ka përhapur përçarje politike nëpër vend. Dhe nëse e majta mund të përdorë ligjet e mafies për të goditur Trump dhe mbështetësit MAGA, atëherë “sy për sy e dhëmb për dhëmb” edhe e majta duhet të përballet me të njëjtat flakë.
Dallimi është se demokratët përdorën RICO-n në 2023 për ta shkatërruar Trump dhe MAGA-n. Ndërsa Trump po flet për ta përdorur RICO-n për të zhdukur ndikimin e një tradhtari të çështjes amerikane.
Historia pas kësaj është kjo: Në një postim në Truth Social para një muaji, Trump shkroi: “George Soros, dhe djali i tij i mrekullueshëm i së majtës radikale, duhet të akuzohen sipas RICO-s për shkak të mbështetjes së tyre për protestat e dhunshme, dhe shumë gjëra të tjera, në të gjithë Shtetet e Bashkuara të Amerikës. Ne nuk do t’i lejojmë këta të çmendur ta shqyejnë Amerikën më tej, pa i dhënë as mundësinë të ‘marrë frymë’ e të jetë e lirë. Soros, dhe grupi i tij i psikopatëve, i kanë shkaktuar dëm të madh vendit tonë! Kjo përfshin edhe shokët e tij të çmendur në Bregun Perëndimor”.
Ai shtoi gjithashtu: “Bëhuni të kujdesshëm, ne po ju shohim! Faleminderit për vëmendjen ndaj kësaj çështjeje!”
Organizata e Sorosit, Open Society Foundations, e kryesuar nga i biri i tij, Alex, reagoi me një mohim, duke thënë: “Ne nuk mbështesim dhe as nuk financojmë protesta të dhunshme.”
“Ne kemi të bëjmë vetëm me të drejtat e njeriut,” thuhej në deklaratë. “Jemi të interesuar vetëm për liritë themelore,” shtohej në deklaratë.
“Ne thjesht po luftojmë për ‘lirinë e fjalës’ dhe një ‘demokraci të gjallë’,” vijonte deklarata.
“Asgjë për t’u parë këtu. Shkoni në shtëpi. Asgjë për t’u parë — përveçse miliona e miliona dollarë që Open Society Foundations derdhin në garat për prokurorë të distrikteve lokale, për të vendosur kandidatë që mbyllin sytë ndaj krimit dhe lejojnë që trazirat civile dhe protestat e dhunshme të përparojnë në rrugë”.
“Drejtësia në shitje,” shkruante Law Enforcement Legal Defense Fund në një analizë 17-faqëshe mbi paratë e Sorosit, publikuar në qershor të vitit 2022. Nga zbulimet? Shtetet e Bashkuara kanë “të paktën 75 prokurorë të drejtësisë sociale të mbështetur nga Sorosi … [të cilët] përfaqësojnë më shumë se 1 në 5 amerikanë, ose mbi 72 milionë njerëz,” dhe që më pas shtyjnë përpara narrativën progresive të butësisë ndaj krimit dhe politikat përkatëse.
“Deri më sot,” shkroi organizata jofitimprurëse LELDF, “Soros ka shpenzuar mbi 40 milionë dollarë në financim të drejtpërdrejtë fushatash gjatë dekadës së fundit për të zgjedhur prokurorë.”
Paqëndrueshmëria e krijuar në rrugë ka arritur deri në sallat e Kongresit.
“Prokurorët e Sorosit kanë mbikëqyrur valë masive krimi,” thuhej në një titull të vitit 2022 në faqen zyrtare të kreut të shumicës në Senat, John Thune.
Në Los Anxhelos, të shtënat u rritën me 69 për qind — nën mbikëqyrjen e prokurorit të mbështetur nga Sorosi, George Gascon.
Në Filadelfia, vrasjet u rritën nga 315 në vitin 2017 në 562 në vitin 2021, në të njëjtën kohë kur Larry Krasner, i mbështetur nga Sorosi, mori përsipër ndjekjet penale.
Në Fairfax County, Virginia, menjëherë pas fitores në postin e prokurorit të Commonwealth-it, Steve Descano, gjithashtu i mbështetur nga Sorosi, njoftoi se zyra e tij nuk do të ndiqte më penalisht një sërë krimesh — një mesazh i pamenduar, që në thelb u tha elementëve kriminalë të vazhdonin dhe të shumëfishonin veprimtarinë e tyre të paligjshme.
Soros ka futur duart në sistemin politik amerikan për shumë gjatë, pa pasoja, pa ndëshkim — pavarësisht faktit se paratë e tij nuk shkojnë vetëm në zona ku ai nuk ka asnjë interes personal, por gjithashtu nxisin agjenda e ide që janë krejtësisht në kundërshtim me parimet kushtetuese dhe ato të rendit e ligjit.
Ka qenë një shkaktar trazirash, në rastin më të mirë; një tradhtar i brendshëm, ndoshta.
Dhe pikërisht këtë do të nxirrte në pah një hetim sipas RICO-s.
Trump në Fox News konfirmoi se Shtëpia e Bardhë me të vërtetë “do ta hetojë Sorosin” për të parë nëse financimi i tij politik, fushatat dhe ndikimet politike kanë kaluar vijën nga e drejta e Amendamentit të Parë në aktivitet anti-amerikan.
Në 2023, Trump dhe 18 kolegë të tij nga MAGA u akuzuan nga fraksione në Qarkun Fulton, Georgia, që shërbenin vullnetit të Partisë Demokratike për shkelje të RICO-s duke u përpjekur të përmbysin rezultatet e zgjedhjeve të 2020. Ishte një përdorim krejtësisht i pabesueshëm i RICO-s. Ishte një akuzë tërësisht qesharake, dhe tani akuza kryesore, prokurorja e Qarkut Fani Willis — e lidhur me Open Society Foundations — po përballet me akuza për vete. Por kutia e RICO-s është hapur.
Trump sigurisht duhet të përdorë çdo pushtet që ka në dispozicion për të prishur sistemin e Sorosit të blerjes dhe korruptimit të sistemit amerikan të drejtësisë — përpara se pushtetet të kthehen përsëri te demokratët dhe mundësia për të korrigjuar kursin të zhduket. Demokratët do të vazhdojnë “lawfare” (luftën ligjore) sa të jenë në gjendje, por ndalimi i rrjedhës së parave të Sorosit do të ngadalësojë aftësinë e tyre, edhe për një kohë të shkurtër.
