Presidenti i Kroacisë, Zoran Milanoviç, në një fjalim të mbajtur në New York gjatë Konferencës Ndërkombëtare për Zgjidhjen e Çështjes Palestineze, theksoi se Kroacia duhet të njohë shtetin palestinez, duke e konsideruar këtë si një të drejtë të pamohueshme dhe jo një shpërblim politik. Ai u shpreh se mbështet këtë hap dhe se vendimi do të merret nga qeveria dhe parlamenti kroat.
Duke komentuar njohjen e fundit të Palestinës nga Franca, Milanoviç tha se ky është një hap drejt drejtësisë, i bazuar në rezolutën 181 të Kombeve të Bashkuara nga viti 1947, e cila propozonte ndarjen e territoreve për dy shtete. Ai theksoi se populli palestinez ka vuajtur për më shumë se një shekull dhe se shteti i tyre duhet të kishte ekzistuar prej kohësh.
Kur u pyet për reagimin e Izraelit dhe skepticizmin e kryeministrit izraelit për krijimin e një shteti palestinez, Milanoviç u shpreh se Izraeli do të vazhdojë sulmet, për sa kohë ka mbështetës ndërkombëtarë. Përsa i përket pritshmërive, ai tha se nuk pret ndonjë zhvillim pozitiv.
