Trupi i një 28-vjeçari shqiptar, i njohur për dënimet e mëparshme për trafik droge në Mbretërinë e Bashkuar, u gjet i varur pranë unazës rrugore të Brukselit, pranë Anderlechtit. Kështu shkruan media belge RTL info., e cila sugjeron se Bekim Halilaj, mund të jetë ekzekutuar për humbjen e një dërgese të madhe kokaine. Megjithatë, autoritetet nuk kanë përjashtuar mundësinë e vetëvrasjes dhe po vazhdojnë hetimet.
Trupi i tij u zbulua të dielën e kaluar i varur në pjesën e prapme të një shenje rrugore në një nga rrugët kryesore të unazës së Brukselit. Pas zbulimit, Zyra e Prokurorit të Brukselit hapi një hetim dhe kreu një autopsi, por nuk dha detaje shtesë mbi rrethanat e vdekjes.
Sipas gazetave belge Sudinfo dhe Het Nieuwsblad, Bekim Halilaj kishte një histori kriminale të njohur. Në vitin 2017, ai u dënua me shtatë vjet burg në Mbretërinë e Bashkuar për trafik kokaine, si pjesë e një rrjeti kriminal shqiptar që kishte trafikuar drogë me vlerë mbi 4 milionë paund në Southampton, Hampshire. Pas një hetimi nëntëmujor, autoritetet britanike kapën sasi të mëdha kokainë dhe para të gatshme në lidhje me aktivitetin e tij kriminal.
Pas përfundimit të dënimit, Bekim Halilaj u deportua në Shqipëri, por më pas u vendos në Belgjikë. Burime për RTL thonë se Halilaj është “rrëmbyer, ekzekutuar dhe varur si paralajmërim pas humbjes së një dërgese të madhe droge, me mesazhin e qartë: ‘Kjo është ajo që ndodh nëse përpiqeni të na dëmtoni.’”
Trupi i tij pritet të riatdhesohet në Shqipëri për t’u dorëzuar familjes. Autoritetet belge po vazhdojnë hetimet për të sqaruar shkaqet e vdekjes dhe nuk kanë dhënë informacione të mëtejshme zyrtare.
