Ndërsa bota shënon Ditën Botërore të Mësuesve, miliona fëmijë në mbarë globin mbeten pa qasje në arsim, kryesisht në vendet e prekura nga konflikte të armatosura.
Kjo ditë, e themeluar në vitin 1994 për të përkujtuar nënshkrimin e Rekomandimit mbi Statusin e Mësuesve më 5 tetor 1966 në Paris, vjen këtë vit nën hijen e një krize të thellë arsimore.
Sipas UNICEF-it, mësuesit janë në zemër të një arsimi cilësor, por sektori vazhdon të përballet me mungesë investimesh dhe rënie të numrit të studentëve.
Një raport i vitit 2024 i këtij institucioni tregon se vetëm 31% e vendeve në botë kanë sisteme efektive të zhvillimit profesional për mësuesit — shumë më pak se objektivi global prej 64%.
Në të njëjtën kohë, numri i fëmijëve dhe të rinjve jashtë sistemit arsimor ka arritur në 272 milionë në vitin 2023, duke u rritur nga 265 milionë një dekadë më parë.
UNICEF paralajmëron se ulja e Ndihmës Zyrtare për Zhvillim (ODA) për arsimin me 3.2 miliardë dollarë — një rënie prej 24% nga viti 2023 — mund ta çojë këtë shifër në 278 milionë.
“Asnjë fëmijë nuk duhet të privohet nga e drejta për të mësuar dhe për të ndërtuar një të ardhme.
Sigurimi i mësuesve të trajnuar, të motivuar dhe të mbështetur nuk do të thotë vetëm ofrimi i njohurive, por edhe mbrojtje, shpresë dhe mundësi për jetën,” – tha Nicola Graziano, president i UNICEF Itali.
Sipas të dhënave të fundit, 234 milionë fëmijë në botë kanë nevojë për mbështetje për të pasur akses në arsim cilësor, një rritje prej 35 milionësh në tre vitet e fundit.
85 milionë prej tyre nuk ndjekin fare shkollën: 52% janë vajza, 17% janë refugjatë ose të zhvendosur brenda vendit, dhe mbi 20% janë fëmijë me aftësi të kufizuara.
Situata është veçanërisht e rëndë në Gaza, ku që nga korriku 2025, rreth 1.46 milionë fëmijë përballen me pengesa të mëdha në arsimim.
Deri në qershor 2025, 588 ndërtesa shkollore ishin prekur nga luftimet – 538 prej tyre në Rripin e Gazës (95.4%) dhe 50 në Bregun Perëndimor.
Në Sudan, më shumë se 17 milionë nga 19 milionë fëmijë në moshë shkollore nuk ndjekin shkollën, ndërsa në Haiti, dhuna e bandave dhe trazirat civile kanë lënë mbi 1.4 milionë fëmijë në nevojë urgjente për mbështetje arsimore.
“Investimi te mësuesit do të thotë investim në të ardhmen,” – thekson UNICEF, duke kërkuar mbështetje të menjëhershme për mësuesit dhe krijimin e klasave gjithëpërfshirëse për çdo fëmijë në botë.
Në këtë Ditë Botërore të Mësuesve, UNICEF shpreh mirënjohje për të gjithë mësuesit dhe edukatorët që, me guxim e përkushtim, vazhdojnë t’u japin fëmijëve njohuri, shpresë dhe dritë – edhe në kontekstet më të vështira.
