Studiuesit kanë zbuluar se arsyeja pse disa domate janë të verdha lidhet me një ndryshim shumë të vogël në gjenin YFT3. Ky gjen prodhon një enzimë që ndihmon në krijimin e pigmenteve natyrale që i japin domates ngjyrën e kuqe. Kur ndodh një ndryshim në këtë gjen, zëvendësimi i një aminoacidi të quajtur serinë me një tjetër të quajtur argininë, enzima nuk punon siç duhet dhe domatet humbasin ngjyrën e kuqe, duke u bërë të verdha.
Një ekip nga Universiteti Shanghai Jiao Tong në Kinë zbuloi këtë mutacion dhe e përshkroi në revistën Horticulture Research. Ata vërejtën se ndryshimi ndalon grumbullimin e pigmenteve të kuqe (karotenoideve) dhe dëmton formimin e qelizave që ruajnë këto pigmente. Edhe pse proteina mbetet në sasi normale, ajo nuk është më aq aktive, ndaj prodhimi i likopenit, pigmentit që i jep domates ngjyrën e kuqe, bie ndjeshëm. Kur shkencëtarët e rikthyen gjenin në formën e tij normale, domatet rifituan ngjyrën e kuqe, duke vërtetuar rëndësinë e këtij gjeni.
Analizat treguan se edhe pse disa gjene të tjera për pigmentet u aktivizuan më shumë, kjo nuk mjaftoi për të kompensuar dëmin. Modelet kompjuterike treguan se ndryshimi në Ser126 e bën enzimën më pak efektive dhe pengon procesin e krijimit të ngjyrës. Si rrjedhojë, frutat zhvillohen me pigment më të paktë dhe mbeten të verdha.
Sipas dr. Lingxia Zhaos, ky zbulim tregon se një ndryshim shumë i vogël në ADN mund të ndikojë dukshëm në pamjen dhe cilësinë e frutit. Njohja e këtij procesi mund t’u ndihmojë shkencëtarëve dhe bujqve të krijojnë varietete domatesh më të bukura, me ngjyrë më të fortë dhe vlera ushqyese më të larta.
