Spanja po i përmbahet vendimit të saj për të mos marrë pjesë në Eurovision, nëse Izraeli nuk përjashtohet, pavarësisht ndryshimeve që po promovohen aktualisht nga EBU në rregullore.
Të enjten në mbrëmje, më 27 nëntor, presidenti i radios dhe televizionit spanjoll RTVE, José Pablo López, e bëri të qartë në Parlament se për sa kohë që Izraeli mbetet, Spanja, një nga 5 vendet e mëdha, nuk do të marrë pjesë në konkursin e ardhshëm që do të mbahet në Vjenë, Austri.
López theksoi se armiqësitë nga ana e Izraelit ishin “provokuese” dhe kishin çuar në një “situatë jashtëzakonisht të rëndë humanitare në Gaza”.
Siç raportohet nga gazeta ‘El Pais’, kur u pyet për këtë çështje nga një anëtar i parlamentit nga grupi socialist, disa ditë para diskutimeve mbi masat e reja për Konkursin e Këngës në Eurovision dhe pjesëmarrjen e Izraelit, të cilat do të zhvillohen javën e ardhshme në Asamblenë e Përgjithshme të Unionit Evropian të Transmetimeve (EBU), López deklaroi se “qëndrimi i RTVE për këtë çështje nuk ka ndryshuar”.
Konkretisht, ai tha:
“Ne mbajmë të njëjtin qëndrim për dy arsye kryesore. Së pari, për shkak të gjenocidit që është kryer në Gaza. Si president i RTVE, unë ende besoj se Festivali i Këngës në Eurovision është një konkurs, por të drejtat e njeriut nuk janë. Dhe mendoj se duhet ta mbajmë mend këtë. Por dua të ngre një çështje tjetër: mosrespektimin sistematik të vetë rregullave nga Izraeli”.
Lopez akuzoi gjithashtu Izraelin për “shfrytëzim politik të konkursit” dhe përpjekje për të ndikuar në votim. Siç tha ai:
“Çdo vend tjetër i përfshirë në këtë lloj përdorimi të konkursit, ju siguroj, do të ndëshkohej dhe do të pezullohej përkohësisht ”, duke lënë të kuptohet toleranca që EBU ka treguar vitet e fundit.
Ai zbuloi gjithashtu se disa ditë më parë mori një letër nga drejtori i përgjithshëm i EBU-së, Noel Curran, në të cilën pranohet se “falë presionit nga RTVE, organizata do të miratojë masa shtesë për të parandaluar ndërhyrjen e qeverisë dhe votat e manipuluara”.
Megjithatë, López sqaroi se këto masa nuk janë të mjaftueshme.
“Ata nuk garantojnë se nuk do të ketë përsëri ndërhyrje nga një qeveri si ajo e Izraelit, apo nga ndonjë qeveri tjetër”, theksoi ai.
Kujtohet se javën e kaluar, Sllovenia njoftoi se nuk do të merrte pjesë në garë.
