Një organizatë e lidhur me George Sorosin dyshohet se ka financuar strehimin e refugjatit afgan që kreu sulmin terrorist të së mërkurës në Uashington ndaj pjesëtarëve të Gardës Kombëtare.
Autor i sulmit të së mërkurës është identifikuar Rahmanullah Lakanwal, një refugjat afgan që hyri në SHBA pas tërheqjes së dështuar të administratës Biden nga Afganistani.
Sipas The New York Times, Lakanwal jeton në Bellingham, Washington, ku ai dhe familja e tij më parë kishin marrë me qira një banesë nga një grua me emrin Kristina Widman.
“Widman tha në një intervistë se qiraja ishte rregulluar përmes World Relief, një organizatë që ndihmon në sistemimin e refugjatëve dhe se ajo kishte pasur pak kontakt me familjen,” shkruan Times. “Ata nuk kanë jetuar në atë pronë prej më shumë se një viti,” shtoi ajo.
Këtu gjërat bëhen interesante, sepse sipas Capstone Report, World Relief lidhet drejtpërdrejt me Sorosin.
Në vitin 2019, Capstone Report publikoi një shkrim për një grup grash të quajtur WELCOME që promovonte “përfshirjen ungjillore në çështjet e imigracionit”.
“Faqja e tyre është welcomeimmigrants.org,” shkruhej në raport. “Informacioni i regjistrit të internetit për atë faqe tregon se World Relief është kontakti administrativ, dhe një adresë emaili lidhet me National Immigration Forum.”
Sipas të njëjtit raport, National Immigration Forum është themeluar nga vetë Sorosi, miliarderi i majtë i njohur për përdorimin e parave të tij për të ndikuar në politikën dhe kulturën amerikane në mënyrë negative.
Për më tepër, drejtori operativ (COO) i World Relief thuhet se e ka filluar karrierën e tij burokratike në Agjencinë Amerikane për Zhvillim Ndërkombëtar (USAID), një agjenci që, sipas raportit, është dobësuar ndjeshëm nga administrata Trump.
E gjithë kjo vjen disa muaj pasi administratorja e Administratës së Bizneseve të Vogla (SBA), Kelly Loeffler, nisi një auditim të të gjithë zyrtarëve të kontraktimit të qeverisë pas një skandali të USAID-it.
Në vitin 2013, zyrtari i kontraktimit në USAID, Roderick Watson, 57 vjeç, pranoi të merrte ryshfete në këmbim të përdorimit të pozitës së tij për t’i dhënë kontrata kompanive Apprio dhe Vistant. Në qershor, Watson u deklarua fajtor për ryshfet dhe mashtrim me tituj financiarë.
Loeffler reagoi ndaj skandalit duke shkruar një letër, e cila është parë nga Fox News, ku theksonte se ajo që ndodhi është “një dëshmi tronditëse e dështimeve sistematike në mbikëqyrje dhe përgjegjësi” dhe paralajmëronte se “nuk ishte një rast i izoluar.”
Ajo gjithashtu udhëzoi drejtuesin e SBA-së, Tre Pennie, i cili mbikëqyr kontratat e agjencisë, që të “veprojë me vendosmëri” për të goditur çdo abuzim të ngjashëm dhe të nisë një auditim të të gjithë zyrtarëve të kontratave që prej vitit 2010.
“Roli i kontraktuesve të qeverisë federale nuk është ceremonial apo për përfitime personale; përkundrazi, është një detyrë me autoritet të madh dhe përgjegjësi të lartë,” shkroi Loeffler. “Procesi i kontraktimit duhet të jetë transparent dhe i bazuar në meritë, jo në përfitime personale.”
Ajo gjithashtu shkroi se skandali i Watson-it “përfaqëson rrëzimin e mekanizmave mbrojtës që supozohet të mbrojnë paratë e taksapaguesve amerikanë dhe të sigurojnë akses të drejtë për bizneset e vogla legjitime.”
Ajo kritikoi edhe administratën e ish-presidentit Joe Biden për dhënien e kontratave kompanive Apprio dhe Vistant.
“Fakti që një zyrtar federal arriti të bëhej pika kyçe e një skeme të madhe dhe të qëndrueshme mashtrimi tregon për një dështim të kontrollit të brendshëm dhe një shpërbërje të sistemit të kontraktimit që kërkon korrigjim të menjëhershëm,” argumentoi ajo.
Sipas Fox News, Loeffler theksoi se SBA luan një “rol kritik” në kontraktimet federale dhe “nuk do të qëndrojë më duarkryq ndërsa abuzimet bëhen në kurriz të taksapaguesve dhe bizneseve të vogla që e meritojnë.”
