Një moment tmerrues është regjistruar gjatë një safari në Sri Lanka, ku një elefant rreth tre tonë sulmoi një minifurgon me turistë.
Kafsha e egër u hodh drejt mjetit, duke e tundur fort dhe duke ngritur dy rrota nga toka.
Dy anëtarë të një familjeje u larguan me vrap nga ana tjetër e mjetit, të frikësuar për jetën. Situata u qetësua vetëm pasi një automjet tjetër turistik iu afrua duke i rënë borisë, ndërsa u dëgjua edhe një e shtënë paralajmëruese.
Pavarësisht dëmeve të mëdha, përfshirë derën e shkulur, turistët arritën të largoheshin dhe fatmirësisht askush nuk u lëndua. Turistja ruse Liliya Mikhailovskaya, 43 vjeçe, tha se ajo dhe familja e saj “pothuajse humbën jetën”.
Ngjarja vjen vetëm pak ditë pas një tjetër alarmi në Indi, ku një elefant i egër ka shkaktuar panik masiv në shtetin Jharkhand, duke vrarë të paktën 22 persona. Autoritetet indiane kanë nisur një operacion të gjerë për kapjen dhe qetësimin e kafshës, e cila besohet se ndodhet në fazën agresive të çiftëzimit, të njohur si musth.
